Қәстләп өлтүрүлгән турғунҗанниң ички әзалири суғурувелинған

Ақсу шәһири, моллакозичи базири 11 - әтрәт 12 номурлуқ адриста олтурушлуқ һисавудун ниязниң оғли турғунҗан 2009 - йили 7 - айниң 28 - күни үрүмчидә башқилар тәрипидин қәстләп өлтүрүлгән. Дохтурханида ички әзалири суғуривелинған.
Мухбиримиз әкрәм
2010.10.13
Share on WhatsApp
Share on WhatsApp
turghunjanning-qoghdash-xadimi-bolghan-we-doxturxanidiki-waqti-305 Сүрәт, 2009 - йили 7 - айниң 28 - күни үрүмчидә қәстләп өлтүрүлгән турғунҗанниң һайат вә өлтүрүлгәндин кейинки сүрәтлири.
http://news.boxun.com Дин елинди.

БУ һәқтики мәлуматлар 2010 - йили 8 - айниң 24 - күни бошүн торида бир қетим елан қилинған Болуп, һазирғичә бәс - муназирә қозғаватқан темиларниң биригә айланған. Торда берилгән учурларға асасланғанда, һисавудун нияз оғлиниң башқилар тәрипидин қәсткә учрап өлгәнлики вә униң ички әзалириниң суғурувелинғанлиқиға наразилиқ билдүрүп, уйғур аптоном районлуқ һөкүмәт һәм үрүмчи шәһәрлик тәптиш идарисиға әрз қилған.
 
Чәтәлдики уйғур сиясий паалийәтчилири вә хәлқара көзәткүчиләр 5 - июл вәқәсидин кейин уйғур сиясий мәһбуслириниң ички әзалириниң суғуривелип, тавар орнида сетиливатқанлиқини илгири сүрүп кәлди. Хәлқара кәчүрүм тәшкилатиниң 2009 - йиллиқ доклатида, йәнә нурғунлиған уйғурларниң һазирға қәдәр из - дерики йоқлуқи баян қилинди. Д у қ баш катипи долқун әйса әпәнди, бу хилдики вәһшиликниң хитайда барғансери әвҗ елишидин әндишә һес қиливатқанлиқини тилға алди.
 
Һисавудун ниязниң үрүмчи шәһәрлик тәптиш идарисиға 2010 - йили 1 - июнда язған әрзнамисидә баян қилинишичә, оғли турғунҗан 2009 - йили 27 - июл күни сәһәр саәт 3:00 билән намәлум кишиләр тәрипидин өз ятиқида қаттиқ урулуп, бинаниң үчинчи қәвитидин йәргә ташливетилгән. Турғунҗан һесавудун қәсткә учраштин илгири, үрүмчи алтай йолидики рүйяң меһманханисида аманлиқ сақлаш хадими болуп ишлигән вә шу меһманханида йетип қопқан.
 
Әйни чағда, үрүмчи сақчи даирилири һисавудун ниязниң шикайитигә етибар қилмай " оғлуң бинадин өзини ташлап өлүвалған" дейиш билән, бу делони бастуруп түгитиветишкә урунған. Әмма, һисавудун нияз дохтурларниң дәлил - испатлирини оттуриға қоюп, оғлиниң бинадин ташливетилиштин илгири қаттиқ урулғанлиқи, пүтүн вуҗудини таяқ излири қаплиғанлиқи, униң бәдән сөңәклириниң еғир дәриҗидә зәхмә йигәнлики, оғлиниң бинадин өзини ташливалғудәк роһий бинормаллиққа гириптар болған инсан әмәсликидә чиң турған.
 
Кишини ечиндуридиғини, һисавудун ниязниң оғли турғунҗан 2009 - йили 8 - айниң 3 - күни үрүмчи қатнаш дохтурханисида җан үзгәндә, дохтурлар турғунҗанниң ички әзалиридин бөрәк, тал вә җигәр қатарлиқ ички әзалириниң оғриланғанлиқини испатлиған. Бу вәһшиликкә чидимиған һисавудун нияз әрзини давамлаштурған вә оғлиниң ички әзалирини оғрилиған җавабкарлар үстидинму әрз - шикайәттә болған.
 
 Һисавудун ниязниң 2010 - йили 4 - айниң 5 - күни уйғур аптоном районлуқ һөкүмәткә язған шикайәтнамисидә, 2009 - йили 11 - айниң 19 - күни дохтурхана хадимлириниң җәсәтни қайтидин оператсийә қилғанлиқи, нәтиҗидә оғлиниң ички әзалириниң аллибурун намәлум кишиләр тәрипидин оғриланғанлиқи, бу ишқа һөкүмәтниң қанаәтләнгүдәк җаваб бериши керәклики оттуриға қоюлған.
 
Турғунҗанға аит хәвәрниң әсли мәнбәсидики рәсимгә кириштүрүлгән бир изаһатта, өлгүчи турғунҗан билән у хизмәт қилған рүйяң меһманханисиниң хитай хоҗайини оттурисида зиддийәт барлиқи, хитай хоҗайинниң турғунҗанға " һаман бир күни сени өлтүрүп, йүрикиңни суғуривалмай қоймаймән!" дегәнлики йезилған.
 
Һисавудун ниязниң әрзнамисидики баянларда көрситилишичә, униң оғли турғунҗан ақсуда оттура техникум мәктәпни пүттүргән. Бир қетим қатнаш һадисигә учрап зәхимләнгән вә үрүмчидә даваланған. Кейин үрүмчи рүйяң меһманханисиға қоғдаш хадими болуп ишқа киргән. 5 - Июл вәқәсигә қатнашмиған вә һеч кишигә яманлиқ қилмиған. Шундақ болсиму, у өзи ишләватқан орунда қаттиқ урулуп болғандин кейин, бинаниң 3 - қәвитидин ташливетилгән. Дохтурханида қутқузуш үнүм бәрмәйла қалмай, ички әзалири оғриланған. Һисавудун ниязниң әрзигә бирқисим һөкүмәт хадимлири имза қоюп " бу мәсилә мувапиқ бир тәрәп қилинсун" дегән болсиму, һазирға қәдәр бир тәрәп қилинмиған вә бу һәқсизликләрниң даваси давамлашмақта икән.

Юқиридики аваз улинишидин, бу һәқтики мәлуматимизниң тәпсилатини аңлайсиләр.


 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.