10-Nöwetlik xelq'ara türk tili musabiqisige Uyghurlarmu qatnashmaqta

Bu musabiqige Uyghurlardin awstraliyide turuwatqan 13 yashtiki muzeppermu qatnashmaqta. Bu musabiqe 2003-yilidin béri ötküzülüwatqan, naxsha oqush, shé'ir déklamatsiye qilish, türkche sözlishish saheliride élip bérilidiken. Musabiqe axirida derijige érishkenler mukapatlinidiken. Biz bu musabiqe heqqide téximu tepsiliy melumat élish üchün yétekchi oqutquchi yawuz ashiq ependi bilen söhbet élip barduq.

Yawuz ashiq ependi aldi bilen türkche olimpik musabiqisi heqqide melumat bérip mundaq dédi:
“Bu olimpik musabiqisi 2003-yili türk tili oqutquchilar jem'iyitining teshebbusi bilen bashlan'ghan idi. Bu yil 10-nöwetliki ötküzülmekte. 2003-Yili ötküzülgen 1-qétimliq türkche olimpik musabiqisige 17 dölettin oqughuchi qatnashqan idi. Hazir ötküzülüwatqan 10-nöwetlik türk tili musabiqisige bolsa 135 dölettin 1500 oqughuchi qatnashmaqta.”

“Siler hazir enqerening qizilchahamam nahiyiside tallash musabiqiliri élip bériwétipsiler, muzepper isimlik bir Uyghurmu qatnishiwétiptu, u yerdiki künliringlar qandaq ötüwatidu?” dégen so'alimizgha u mundaq jawab berdi:
“Sizgimu melum musabiqe 30-may künidin, 14-iyun'ghiche dawamlishidu. 30-May künidin, 3-iyun künigiche istanbulda kültür bayrimi ötküzüldi. 135 Dölet öz döletlirining kültürini tonutqan bölmiler achti. Bu bölmilerni istanbul we uning etrapidiki wilayetlerdin kelgen kishiler ziyaret qildi. Awstraliyide turuwatqan sherqiy türkistanliq muzeppermu bu pa'aliyetke qatnishiwatidu. Biz hazir qizilchamamda, bu yerde hazir musabiqiler ötküzülmekte. Bu yerde shé'ir déklamatsiye qilish, naxsha oqush, türkche sözlishish musabiqiliri ötküzülmekte. Bu musabiqilerde birinchi bolghan oqughuchilar enqerede ötküzülidighan hel qilghuch musabiqige qatnishidu.”

“Uyghur oqughuchi muzepper qaysi sahede musabiqige qatnashmaqchi?” dégen so'alimizgha yawuz ashiq mu'ellim mundaq jawab berdi:
“Muzepper türkche sözlishish musabiqisige qatnashmaqchi. Bügün türkche sözlishish tallash musabiqisige qatnashti. Netijisini kütüwatimiz. Muzepper qisqa waqit ichide türkche öginiwaldi, Uyghurchinimu bilidu. Xuda buyrusa musabiqide yaxshi netijige érishidu.”

“Qizilchahamamdiki oqughuchilarning ehwali qandaqraq?” dégen so'alimizgha u mundaq jawab berdi:
“Her millet we her dindiki kishiler bu yerge jem boldi. Dunya tinchliqi we dunyadiki milletlerning qérindashliqi namida hemme oqughuchilar bu yerde bir-biri bilen tonushup sirdishiwatidu. Bu yerdiki menzire körüshke tégishlik bir menzire.”

Kéyin 13 yashtiki Uyghur oqughuchi muzepperge mikrofonimizni uzattuq.