Türkiyide ötküzülgen 20 - nöwetlik xelq'ara xazar shé'ir oqush kechlikige Uyghur sha'irlarmu qatnashti

Bu shé'ir oqush kechliki 14 - esirde anatoliyide yashighan meshhur xelq sha'iri yunus emrige atalghan bolup, bu pa'aliyetke ezerbeyjan, qazaqistan, özbékistan, qirghizistan we dunyaning herqaysi döletliride yashawatqan türkiy milletlerdin yazghuchilar qatnashti. Uyghur sha'irliridin türkiyide turiwatqan nürela göktürk xanim qatnashti. Uning özi yézip déklamatsiye qilghan “Höriyet isteymen” mawzuluq shé'iri anglighuchilarning qizghin alqishigha érishken.

6 - Ayning 22 - künidin 25 - künigiche dawamlashqan xelq'araliq bu pa'aliyetke elazih wilayitining waliysi muhammer erol, eskishehir waliysi qadir qochdemir, parlamént ezaliri shu'ay alpay, sermin baliq we faruq septi'oghlu hemde elazih sheher bashliqi sülayman selman'oghlu qatarliq kishiler qatnashti we söz qildi. 3 Kün dawamlashqan bu shé'ir déklamatsiye kechlikige türkiye dölet téléwiziyisi bolghan t rt awazi arqiliq neq meydandin tarqitildi.

Bu pa'aliyet jeryanida sha'irlar shé'ir déklamatsiye qilipla qalmastin belki, türk dunyasining mesililiri heqqidimu munazire élip baridu. Xazar köli xelq'ara shé'ir kéchiliri 1992 - yili ottura asiya türkiy jumhuriyetliri musteqil bolghandin kéyinla ötküzülüshke bashlan'ghan bolup, hazirghiche bu pa'aliyetke dangliq yazghuchi chinggiz aytmatow, dangliq ezerbeyjan sha'iri bextiyar waxapzade, qazaq sha'iri muxtar shaxanow, türkmen sha'iri oraz yamghur ependi we köp sanda dangliq türk sha'irlirimu qatnashqan.