Uyghur, tibet we mongghullar bryussélda bash qoshti

24-Féwral küni Uyghur, tibet, mongghul we xitay teshkilatlirining aktipliri bélgiyining bryussél shehiridiki yawropa parlaméntida yéshillar we solchil partiyisi wekilliri bilen söhbette boldi.

Bir sa'et dawam qilghan bu söhbette ottura sherqtiki xelq naraziliqining xitaydiki sholisi bolghan yasimen güli herikiti, ölümge höküm qilin'ghan 4 neper Uyghurning ehwali, qeshqerdek qedimiy sheher iznalirining öchürülüshi, barghanséri ewjige chiqiwatqan adem ichki ezasi etkeschiliki, assimilyatsiyige uchrawatqan ana til mesilisi qatarliqlar heqqide melumat bérildi. Shuning bilen bir waqitta yene Uyghur milliy herikitining rehbiri rabiye qadir xanimning nobél mukapati namzati bolushini öz ichige alghan keng sahede muzakiriler bolup ötti.

RFA/Pidaiy

Uyghur, tibet, mongghul we xitay wekilliridin terkib tapqan bu birleshme guruppini teklip qilghan yéshillar partiyisi, ularning zulumgha qarshi birleshken ittipaqliqini medhiyilidi we yawropa parlaméntidiki bashqa partiyilergimu xizmet ishlep, iqtisadiy menpe'etni aldinqi orun'gha qoyuwalghuchilarghimu tesir körsitish üchün tirishchanliq körsitishining muhimliqini tekitlidi.

Ular söhbet axirlashqandin kéyin shu yerdiki bir chayxanida qehwe ichkech öz tejribe-sawaqlirini almashturup, bundin kéyinki heriketlerde bolidighan hemkarliqliri üstide pikir birliki hasil qilishti. Dostluqni kücheytken aktiplar öz-ara sowgha teqdim qilishti.