Xitay armiyisi intérnétni porox hédi yoq jeng meydanigha aylandurmaqchi

Amérika mutexessisliri muhim intérnét matori bolghan gugul torigha we gherb shirketlirige hujum qozghighan xakkérlarning aptori xitay hökümiti qollawatqan kishiler ikenlikini éniqlap chiqip, buning jeryanini bügün tepsiliy bayan qilghan idi.
Muxbirimiz weli
2010-02-22
Share

Xitay armiyisining bir générali derhal otturigha chiqip, hökümetni ochuq - ashkara halda intérnétni kontrol qilidighan bir yéngi organ qurushqa chaqirdi.

Roytrs agéntliqining béyjingdin bayan qilishiche, xitay azadliq armiyisining général mayori xu'ang yungyin bügün bayanat élan qilip, xitay hökümitini derhal bir yéngi organ qurup, intérnétni kontrol qilip, uchurlarni süzüsh - tekshürüsh we torlargha xakkér bilen hujum qozghap turushqa chaqirghan.

Xitay générali xu'ang bu chaqiriqini, nyuyorkta chiqidighan 'maliye waqit géziti' bügün, gugul torigha hujum qozghighan xakkérlar heqqidiki tekshürüsh netijisini élan qilghandin kéyinla otturigha qoyghan. U hökümetni ochuq - ashkara halda intérnétni kontrol qilidighan bir yéngi organ qurushqa chaqirghan sözide, xitay merkizi partiye mektipining kadirlar munazire munbiride otturigha qoyulghan 'intérnét emdi porox hédi yoq jeng meydanigha aylinidu' dégen sözni biwaste qollan'ghan.

Xakkérlar shangxey qatnash uniwérsitéti bilen sendung aliy pen - téxnika mektipidiki kompyutérlardin chiqqanliqi éniqlandi

Bügün 'maliye waqit géziti' de élan qilin'ghan doklatta, amérika mutexessisliri muhim intérnét matori bolghan gugul torigha we gherb shirketlirige hujum qozghighan xakkérlarning aptori xitay hökümitining qollishi astidiki kishiler ikenlikini éniqlap chiqqan we buning jeryanini tepsiliy bayan qilghan idi.

Gugul torigha hujum qozghighan xakkérlar xitayning dölet bixeterlik meslihetchisi, özining qiliwatqan ishini 'erkin kesip' dep atiwalghan 30 nechche yashliq melum bir kishi teripidin layihiligenlikini éniqlap chiqqan amérika intérnét bixeterliki mutexessisi maykél kéwénning éytishiche, xitayda layihiligen bu xil xakkérlar, tor ehlining kompyutérida intérnét pa'aliyitini yürüshtürüp béridighan 'intérnét kezgüchi' Internet Explorer yumshaq détaligha chaplishiwélip, intérnétke kirgen bashqa köp shexsining pa'aliyitini özining gherezlik hujumi üchün xizmet qilduridiken.

Xewerde éytilishiche, amérika mutexessisliri pütün dunyada 'pilek boylap xemek izlesh' usulini qollinip, layihilen'gen bu xakkérlarning shangxey qatnash uniwérsitéti bilen sendung aliy pen - téxnika mektipidiki kompyutérlardin chiqqanliqini éniqlap chiqqan.

Xitay générali jinayetni iqrar qilip setleshkendin köre, ashkara halda intérnétni kontrol qilidighan bir yéngi organ qurmaqchi boluwatidu

Shangxeydiki melum bir aliy mektepte kompyutér ilmi buyiche doktor kandidati bolup oquwatqan jang famililik ependining radi'omiz arqiliq élan qilghan mulahiziside bayan qilinishiche, shangxey qatnash uniwérsitéti bilen sendung aliy pen - téxnika mektipi kompyutér téxnikisini tereqqi qildurushta dölet mudapi'e qisimliri we qoralliq saqchi qisimlar bilen zich munasiwet baghlap kéliwatqan mektep. Bu mekteplerdin oqush püttürgenler adette biwaste herbiy qisimlargha teqsim qilinidu. 'Maliye waqit géziti' de élan qilin'ghan doklatta, xakkérlarning hujumi mushu mekteplerning kompyutérliridin bashlan'ghan dégini ishenchilik.

Bu ependining qarishiche, hazir xitay hökümiti özining intérnétke xakkér bilen hujum qilghan jinayitini dunya jama'etchiliki aldida étirap qilmay mumkin emes. Bu jinayetning xitay azadliq armiyisi bilen biwaste munasiwiti bar. Shunglashqa bügün bu mesile dunyagha élan qilin'ghan haman, xitay armiyisining générali derhal otturigha chiqip, xitay hökümitini jinayetni iqrar qilip setleshkendin köre, biraqla ochuq - ashkara halda uchurlarni tekshürüsh we xakkér bilen hujum qozghap turush arqiliq intérnétni kontrol qilidighan bir yéngi organ qurup chiqishqa chaqirdi.

Bu, xitayning buningdin kéyin yene dawamliq halda, intérnéttiki uchurlarni süzüsh - tekshürüsh we dunyaning intérnét sistémisigha xakkér bilen hujum arqiliq intérnétni kontrol qiliwalmaqchi boluwatqanliqidin, intérnétni emdi porox hédi yoq jeng meydanigha aylanduridighanliqidin dérek béripla qalmastin, belki xitayda hazir ijtima'iy exlaq, partiye, hökümettin tartip, herbiy qisimlarghiche pütünley buzulup esebileshkenlikini körsitidu.
 
Yuqiridiki awaz ulinishidin, bu heqtiki melumatimizning tepsilatini anglaysiler.
 
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet