Xitay dunyada ijabiy obraz tiklesh üchün 45 milyard yüen meblegh salghan

'Jenubiy xitay seher géziti' ning bayan qilishiche, xitay hökümiti xelq'arada özining obrazini yaxshilash üchün, 45 milyard yüen meblegh ajratqan. Bu pulni xitay kommunist partiyisining merkizi TV istansisi, shinxu'a agéntliqi, xelq gézitidin ibaret üch chong uchur wastisi özining teshwiqat torlirini pütün dunyagha kéngeytish üchün 15 milyard yüendin ayrishiwalghan. Xitayning bu teshwiqat wastiliri buningdin kéyin qanal, sehipilrinila emes, til türlirinimu hessilep köpeytidiken.
Muxbirimiz weli
2009.02.04
Dollar-Sale-305 Xitayning melum pul muamile dukinidiki körgezmige tizilip qoyulghan amérika dolliri.
AFP Photo

Li changchün: bu zamanda kimning teshwiqat qorali ilghar bolsa, dunyada shuning tesiri küchlük bolidu

Radi'omiz muxbirlirining bayan qilishiche, xitay kommunist partiye merkizi komitéti siyasiy byurosining da'imiy ezasi li changchün yéqinda qilghan sözide 'bu zamanda kimning teshwiqat qorali ilghar, iqtidari yuqiri bolsa, dunyada shuning tesiri küchlük bolidu' dégen.

Xitay xelq uniwérsitéti uchur - waste tetqiqat ornining mu'awin bashliqi xu beyjing xitay emeldarlirining sözini sherhilep ' amérika 1945‏ - yilidila dölet munasiwetliri istratégiyisini tüzüp chiqip, erkinlik dése hemme kishi amérikini köz aldigha keltüridighan, amérikining qimmet qarishi dése, hemme kishi teng - barawerlik, démokratiye, erkinlikni köz aldigha keltüridighan qilish üchün özining uchur wastilirini qurup chiqqan idi. Biz téxi uchur wastilirini istratégiye pellisige yetküzelmiduq. Bizning bu ajizliqimiz 2008‏ - yilida toluq ashkarilandi' dégen.

Xu beyjing: chet'el muxbirlirini qoghlap chiqarghan iduq, jédel jimiqti

Xitayning uchur - waste tetqiqat ornining bashliqi xu beyjing bayanida 'on tötinchi mart tibet weqesi' yüz bergendin kéyin, dunyadiki uchur wasitilirida dalay lama guruhi yétekchi orun'gha ötüp qaldi. Tibet milletchiliki junggoning teshwiqatini gumran qildi.
Emma, biz chet'el muxbirlirini qoghlap chiqirip, uchur wastilirini kontrol qiliwalghandin kéyin, gerche bu, burunqi zamanlardiki yépiq jem'iyet we mustebitlik shekil bolsimu, emma bu chare yenila jédelni jimiqturdi' dégen.

Uning qarishiche, 2008‏ - yil 4 ‏ - ayning 1 ‏ - künidin kéyin, béyjing olimpik mesh'ili pütün yer sharida aylandurulghanda, london, parizh, san franséskolarda tosalghugha uchrighan idi, hökümitimiz buninggha amal qilalmidi. Mana bu bizning dölet munasiwetliri istratégiyimiz tiklinip, buninggha munasip halda uchur - wastiliri qurulmighanliqtin bolghan.

Xitayning obrazini qilghan gépining ras yaki yalghanliqi belgileydu

Amérika awazining bayan qilishiche, amérikidiki may'ami uniwérsitétining xitay mesililiri tetqiqatchisi déllér yuqiridiki köz qarashni ret qilidu. Uning bayan qilishiche, xitay kommunist hökümiti 1949‏ - yilidin kéyinla, özining kommunizm teshwiqatini pütün dunyagha yüzlendürüshke bashlighan idi. Her xil tilda neshr qilghan kitablirida hedep 'xelqning bextlik turmushqa érishkenliki'ni teswirligen idi. Dunyada kommunizm sistémisi gumran bolghandin kéyin bolsa, xitay özining kungzi telimati buyiche ish qilip kéliwatqanliqini teswirlidi. Emma bu teshwiqatlarning héchqaysisining ünümi körülmidi, buninggha xitay qilghan gepning ras yaki yalghanliqi sewebchi boldi.

Xitay dunyada ijabiy obraz tiklimekchi bolsa, buninggha delil körsitishi kérek

Amérikidiki washin'gton uniwérsitétining amérika - xitay munasiwetliri proféssori jozip ependining bayan qilishiche, héchkim özining ijabiy obrazini oydurmichiliq yaki yalghan teshwiqat bilen tikliyelmeydu. Xitay hökümiti dunyada özining ijabiy obrazini tiklimekchi bolsa, buning üchün choqum delil - pakit körsitishi kérek. Kishilik hoquqqa hörmet qilishi, bashqilarning eqliy mülük hoquqini étirap qilishi, saxta mal, saxta dora ishlepchiqarmasliqi kérek.

Londondiki kesh weqesidin kéyin xitayning milletchilik obrazi yene peyda boldi

Birleshme agéntliqining bayan qilishiche, londondiki kambrij uniwérsitétining oqughuchiliri wénjabawgha 'bu mustebit bizning mektepte özini satamdiken' dep warqirap kesh atqandin kéyin, neq meydandin élin'ghan uchurlarni xongkong TV liri körsetse, xitay hökümiti uni késiwetken idi. Emma tünügün xitayning merkizi TV istansisi hemme körünüshni özi toluq körsetti.

Buningdin kéyinla, xitay milletchiliki qozghilip, wén jyabawgha kesh étip 'junggoning obrazi'gha chéqilghan chet'elliklerge öchmenlik ipadilep esebiylishishke bashlidi. Xitayda 258 milyon ademning intérnét torliridiki pa'aliyitini közitiwatqan tor saqchiliri derhal heriketke kélip, chet'ellerdiki démokratiyini medhiyiligen obzorlarni késishke, xitaydiki mustebitlikni pash qilghan kishilerni iz qoghlap sürüshtürüshke bashlidi.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.