Хитай, чошқа зукминиң йеза мәктәплиридә тарқилишидин җиддий әндишә қилмақта

Хитайда чошқа зукам юқуми вәзийити барғанчә җиддий болмақта,нөвәттә чошқа зукими тарқалған шәһәр һәм наһийиләр сани 510 ға йәткән болуп, хитай даирилири чошқа зукиминиң йеза -кәнтләрдики мәктәпләрдә кәңри тарқилиш еһтималлиқидин әндишә қилмақта икән.
Мухбиримиз гүлчеһрә
2009.12.09
Share on WhatsApp
Share on WhatsApp
Xitayda-choshqa-kesili-305 29 - Апрел күни бейҗиң кочилириниң биридә чошқа зукамидин мудапиә көрүп маска тақивалған бир йолучиниң көрүнүши.
AFP Photo

Хитай сәһийә министирлики 7 - декабир күни хитайда чошқа зукиминиң юқумлиниш әһвали һәққидә " дөлитимиздә чошқа зукимидин юқумлиниш вәзийити интайин җидди" дәп агаһландуруш елан қилди. Униңда көрситилишичә, хитай миқясида чошқа зукуминиң тарқилиши йәниму бир қәдәр тез һәм кәң боливатқан болуп, чошқа зукам сәвәблик өлгәнләр санидиму ешиш көрүнгән, шундақла мәктәпләр тарқилиш бир қәдәр тез боливатқан шундақла алдини елиш ишлири җиддий риқабәткә дуч келиватқан хәтәрлик орунлар һесаблинидикән.

Һазирғичә чошқа зукими таралған 510 шәһәр һәм наһийиләрдә, чошқа зукам юқумдарлири 97 миң нәпәрдин ашқан. Буниң ичидә 326 си өлгән. Чошқа зукам юқумдарлириниң ичидә еғир кесәлләр 32 %ни, һамилдар аяллар 14%ни игиләйдикән.

Гәрчә, хитайда чошқа зукам ваксиниси әмлигәнләр 31 өлкә һәм шәһәрләрдә,җәмий 30 милйондин ашқан болсиму, ваксина әмлигәнләр ичидиму еғир кесәлликләр көрүлгән.

Җүмлидин уйғур елидә чошқа зукам юқум әһвали хитайниң башқа өлкилиригә қариғанда бир қәдәр кейинрәк байқалған болсиму, юқумлиниш вәзийити барғанчә җиддий болмақта. Һазирғичә уйғур ели миқясида чошқа зукам вируси юқтуривалғанлар 1762 нәпәргә йәткән, буниң ичидә өлгәнләр 7 нәпәр.

Юқумдарларниң ичидә әһвали еғирлири 58 нәпәр болуп, дохтурханиларда йәнә 20 нәпәр юқумдар үстидин җиддий қутқузуш елип берилмақта икән.

Мәйли уйғур елидә болсун вә яки хитай өлкилиридә болсун сәһийә даирилирини әндишигә селиватқан әң җиддий мәсилә, чошқа зукиминиң мәктәп орунлирида тарқилишиниң бир қәдәр тез һәм кәңри болуватқанлиқи болуп, юқумдарлар ичидә оқуғучилар әң көп нисбәтни игилигән.

Бу мунасивәт билән бүгүн йәни 9 - декабир күни хитай сәһийә министирлики һәмдә маарип министирлики бирликтә чошқа зукиминиң йеза мәктәплиридә кәңри тарқилишиниң алдини елишта җиддий тәдбир қоллиниш һәққидә мәхсус уқтуруш чиқарған.

Хитай һөкүмәт тор бетидә бу һәқтә елан қилинған уқтурушта, "хитай дөләт кабентиниң мунасивәтлик һөҗҗитиниң роһиға асасән мәктәп орунлирида чошқа зукам тарқилишни йәниму җиддий тәдбир елип контрол қилиш, оқуғучилар арисида юқумлиниш, өлүшни әң төвән чәккә чүшүрүш үчүн сәһийә һәм маарип тармақлири бирликтә қаттиқ тәдбир елиш, юқумлуқ кесәлликләрниң алдини елишқа мунасивәтлик кәспий хадимларни мәктәп орунлириға җиддий сәпләш, болупму йеза мәктәплиридә барлиқ амалларни қоллинип чошқа зукиминиң йәниму кәңри тарқилишини контрол қилиш" тәкитләнгән.

Хитай һөкүмитиниң мәзкур мәсилигә болған җиддий позитсийиси тәкитләнгән бу уқтурушта йәнә мәктәпләрдә чошқа зукам вәзийитини тәкшүрүш барлиқ мәктәпләрдики мәмурий рәһбәрликниң күндилик биринчи вәзиписи болуши керәклики, йеза мәктәплиридә оқуғучи оқутқучилар арисида чошқа зукам юқум әһвали байқалған һаман әтраплиқ тәкшүрүп ениқлап, юқумланғучиларни җиддий көзитип айрип бир тәрәп қилип, юқумлинишни бих һалитидә йоқитиш, мәктәпләрниң чошқа зукимиға тақабил туруш һәрикитидә йезилиқ һөкүмәт һәмдә барлиқ мунасивәтлик мәмурий даириләр ярдәмдә болуштәк җиддий тәдбирләрни елиш һәққидә ениқ түзүмләр бәлгиләнгән.

Илгири хитай тармақлири тәрипидин мәктәпләрдә бир синипта 10 оқуғучида нәпәс йоли кесәлликлири яки қизиш көрүлсә дәрһал дәрс тохтитиш бәлгиләнгән иди, йеңи уқтурушта бир синипта бәш оқуғучида бу хил әһвал көрүнгән һаман дәрс тохтитип чошқа зукам юқум әһвалини көзитиш бәлгиләнгән.

Хитай сәһийә министирликиниң доклатидин мәлум болушичә, хитайда һазирғичә байқалған чошқа зукам юқумдарлириниң 30%тин артуқини оттура вә башланғуч мәктәп оқуғучилири игилигән.

Хитай сәһийә даирилириниң агаһландурушиға қариғанда, хитайда чошқа зукам юқум вәзийити йеңи йилниң алди кәйнидә йәниму юқири бир пәллигә чиқиши мумкин буниң ичидә адәм зичлиқи бир қәдәр юқири болған мәктәп орунлири йәниму җидди юқум вәзийитигә йүзлиниш хәтиригә дуч келидикән.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт