Chungching qatarliq biwasite sheher we ölkilerde hazir hökümetke qarshi chong namayish boluwatidu

Xitayda hazir kommunist partiyining yuqiri qatlimida hoquq urushi jiddiy dawamlishiwatidu, jem'iyette bolsa, mushu bir nechche kün ichide chungching, tyenjin, lyawning, xeynen, jyangsu, gu'angdung qatarliq biwasite sheher we ölkilerde xitay hökümitige qarshi chong namayishlar partlidi.

Xitay kommunist partiye herbiy komitétining orgini bolghan “Azadliq armiye géziti” we sichüen ölkilik partkom organ géziti bolghan “Chungching géziti” jüme küni pütün xelqqe, partiye merkizi komitétini qollash toghrisida muraji'etname élan qildi. Shuning bilen bir waqitta chungching shehiride, merkizi komitét wezipidin toxtatqan bo shileyni qollaydighan intérnét tor ponkitlirini taqiwetti. Bu, xitayda hazir kommunist partiyining yuqiri qatlimida hoquq urushi jiddiylishiwatqanliqining inkasi.

Xongkongdiki éqim mesililiri obzorchisi pen shawtawning bayan qilishiche, kommunist partiyining yuqiri qatlimida hoquq urushi jiddiy dawamlishiwatqan mushundaq bir weziyette, chungchingda onminglighan xelq kochilargha chiqip namayish qiliwatidu. Bu namayishlar kommunist partiyining chaqiriqigha awaz qoshup ötküzülgen namayish emes, bo shileyni qollaydighan namayishmu emes, belki xitay hökümitige qarshi namayish. Yéqinqi bir nechche kündin biri xitayning “Xelq géziti”, “Shinxu'a agéntliqi” qatarliq uchur wasitiliri xelqtin, merkizi komitétning bo shiley toghrisidiki qararini qollashni telep qilip toxtimay sözlewatidu, emma uningda chungchingda yüz bergen bo shiley, wang lijün délolirining tepsilatigha da'ir héchnémini sözlimeydu, eger xelq bu heqte sözlise, ularni “Ighwa tarqatti” dep basturidu.

Radi'omizgha yétip kelgen uchurlardin qarighanda, chungching shehiride wenshéng rayoni bilen yene bir rayonning birleshtürüwétilgenlikige qarshi ötküzülgen namayish ötken jüme küni eng jiddiy bolghan, namayishqa qatnashqa adem sani yüz minggha yetken. Xitayning qoralliq saqchi qisimliri namayishchilardin onmingdek ademni urup yarilandurghan, xitayning qoralliq saqchi qisimliridin 1700 adem yarilandurulghan. Doxturxanilar yaridar qobul qilish iqtidarini yoqatqan. Pütün sheherde dukanlar taqalghan. Gerche bundaq jiddiy weziyet hazir bir az bésiqqan bolsimu, emma xelqning qarshiliqi téxi bésiqmighan.

Xitayda kommunist partiyining yuqiri qatlimida hoquq urushi jiddiylishiwatqan mushu weziyette, tyenjin, lyawning, xeynen, jangsu, gu'angdung qatarliq bashqa biwasite sheher we ölkilerdimu hazir xitay hökümitige qarshi chong namayishlar boluwatidu.

Radi'omizgha yétip kelgen uchurlardin qarighanda, ötken jüme küni tyenjin shehirining xeybin rayonida onminglighan sheher ahalisi kochilargha chiqip, hökümetning bu rayonda her yili 260 ming tonna plastamasa ishlepchiqiridighan téximu chong ximiye zawuti qurushigha qarshi namayish ötküzgen. Namayishchilar xitayning saqchilirining tosqunluq qilishigha qarimay “Hökümetke pul lazim bolsa, xelqqe jan lazim” dep sho'ar towlap namayishni dawamlashturghan. Tyenjindiki bu namayish téxi bésiqmidi.

Lyawning ölkisining ensen polat shehiridimu düshenbe küni besh ming neper polat ishchisi sheherlik hökümet binasi aldigha kélip polat zawutida nikél séxi qurushqa qarshi namayish ötküzgen we sheherlik hökümet binasigha hujum qilghan. Xitay hökümiti muqimliqni saqlash dégen nam bilen ensen polat zawutigha qoralliq saqchi qisim ewetip nazaret qilishqa bashlighan we hökümetning zawut qurush pilanigha qarita oxshimighan pikirde bolushqa ruxset qilinmaydu dep jakarlighan. Emma bu zawutta ishchilar purset bolsila üskünilerni chéqip weyran qilidighan hadise toxtimay dawam qiliwatidu.

Xeynen ölkisining yinggé sheherchisidimu on minglighan sheher ahalisi shenbe küni éléktr zawuti qurushqa qarshi namayish ötküzgen. Bu sheherchige qoshna bolghan féngtang mehellisidiki xelqlermu bu namayish sépige qoshulghan. Bir nechche kündin buyan xitayning qoralliq saqchi qisimliri bu sheherchide yash aqquzush bombisi étip, namayishni chékindürüshke urunuwatidu.