تۇرمۇھەممەت ھاشىم ياپون - ئۇيغۇر مۇناسىۋەتلىرىنىڭ تارىخى ھەققىدە توختالدى

ياپونىيىنىڭ نىگاتا شەھىرىدە ياپون - ئۇيغۇر مۇناسىۋەتلىرى ھەققىدە نۇتۇق سۆزلىگەن ئۇيغۇر مۇتەخەسسىس تۇرمۇھەممەت ھاشىم ياپون - ئۇيغۇر مۇناسىۋەتلىرىنى قەدىمكى، يېقىنى ۋە ھازىرقى زامان تارىخىي بويىچە 4 نۇقتىغا بۆلۈپ چۈشەندۈردى.
ئىختىيارى مۇخبىرىمىز قۇتلۇق
2012.11.16
turmemet-hashim-soz-qildi-305.jpg تۇرمۇھەممەد ھاشىم ئەپەندى ياپونىيىنىڭ ئاساسىي قانۇن تۈزۈلگەنلىكىنى خاتىرىلەش پائالىيىتىدە سۆز قىلدى. 2012-يىلى 3-ماي، ياپونىيە.
RFA/Erkin Tarim


ئۇ بۇ نۇقتىنى 11 - ئاينىڭ 15 - كۈنى نىگاتا شەھەرلىك «روتاري» كۇلۇبىنىڭ ئورۇنلاشتۇرۇشى بىلەن نۇتۇق سۆزلىگەن دوكتور تۇرمۇھەممەت ھاشىم ئەپەندى «21 - ئەسىردىكى ياپونىيىدىكى ئۇيغۇر داۋاسى رابىيە قادىرىدىن باشلاندى» دېگەن تېمىدىكى دوكلاتىدا ئوتتۇرىغا قويدى.

تۇرمۇھەممەت ھاشىم ياپونىيە ئوتتۇرا - ئاسىيا تەتقىقات ئىنستىتۇتىنىڭ رەئىسى ۋە دۇنيا ئۇيغۇر قۇرۇلتىيى تەتقىقات مەركىزىنىڭ مۇئاۋىن رەئىسى.

ئۇ ئالدى بىلەن ئۇيغۇرلارنىڭ ۋەتىنى شەرقىي تۈركىستانىڭ تارىخى، جۇغراپىيىلىك ئورنى ۋە ئۇيغۇرلارنىڭ قەدىمىي كۈسەن دەۋرىدىن باشلاپلا ياپونىيە خەلقى بىلەن باغلىنىش ھاسىل قىلغانلىقىنى ئوتتۇرىغا قويدى.

ئۇ يەنە، 2 - دۇنيا ئۇرۇشى مەزگىلىدىكى شەرقىي تۈركىستان ئىسلام جۇمھۇرىيىتىنىڭ دېۋىزىيە كوماندىرى مەخمۇت مۇھىتى باشچىلىقىدىكى بىر گۇرۇپپا كىشىلەرنىڭ ياپونىيىگە كېلىپ ياپونىيە ھۆكۈمىتىدىن شەرقىي تۈركىستان ئىسلام جۇمھۇرىيىتىنى ئەسلىگە كەلتۈرۈش ئۈچۈن ياردەم كۈتكەنلىكىدىن ئىبارەت ئۇيغۇرلار بىلەن ياپونلارنىڭ سىياسىي باغلىنىشى ھەققىدىمۇ توختالدى.

دوكتور تۇرمۇھەممەت دوكلاتىدا ئاساسلىقى ئۇيغۇر سىياسىي داۋاسىنىڭ ياپونىيىدە رەسمىي يوسۇندا ئاڭلىتىلىشى ھەققىدە توختالدى.

ئۇ ئۇيغۇر سىياسىي داۋاسىنىڭ ياپونىيىدە ھەقىقىي تۈردە مەيدانغا كېلىشى 2007 - يىلى نويابىردا ئۇيغۇر مىللىي ھەرىكىتى رەھبىرى رابىيە قادىر خانىم ياپونىيىدىكى ئون چوڭ شەھەردە نۇتۇق سۆزلىگەن مەزگىلدىن باشلىنىدىغانلىقىنى ئوتتۇرىغا قويدى.

تۇرمۇھەممەت ھاشىم يەنە، 2008 - يىلى ياپونىيىدە ئىلھام مەخمۇت باشچىلىقىدىكى ياپونىيە ئۇيغۇر جەمئىيىتى قۇرۇلغانلىقى ۋە شۇندىن كېيىن ياپونىيىدىكى ئۇيغۇر داۋاسى تېخىمۇ سىستېمىلاشقانلىقىنى بىلدۈردى.

.

ئۇ يەنە، 2012 - يىلى 5 - ئايدا توكيودا دۇنيا ئۇيغۇر قۇرۇلتىيى 4 - نۆۋەتلىك قۇرۇلتىيىنىڭ ئېچىلىشى ئۇيغۇرلار بىلەن ياپونلار مۇناسىۋىتىنى تېخىمۇ يۇقىرى سەۋىيىگە كۆتۈرگەنلىكىنى بىلدۈردى.

دوكلات سائەت ئون ئىككى يېرىمدىن بىر يېرىمغا قەدەر داۋاملاشتى. دوكلاتقا تەخمىنەن ھەر ساھە ئاممىسىدىن بولۇپ يۈزگە يېقىن كىشى قاتناشتى.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.