دالايلامانىڭ ئاكىسى، تىبەتنىڭ ئۈزۈل - كېسىل مۇستەقىللىق تەرەپدارى، ۋاپات بولدى

 ۋاشىنگتوندىكى خەلقئارالىق تىبەتكە ياردەم ھەرىكىتى تەشكىلاتىنىڭ مەخسۇس ئېلان قىلغان باياناتىدا كۆرسىتىلىشىچە، دالاي لاما ئاكىسىنىڭ ۋاپاتىنى 6 - سېنتەبىر كۈنى تاڭ سەھەردە ئۇققان.

دالاي لامانىڭ ئاكىسىنىڭ دىنىي ئىسمى تاسەر رىنپوچە بولۇپ، تۇپتېن جىگمې نوربۇ ئۇنىڭ ئەسلى ئىسمى. ئۇ، ئىنىسى دالاي لاما بىلەن تىبەتنىڭ تەقدىرى مەسىلىسىدە ئوخشىمىغان قاراش ۋە يولغا ئىگە بولۇپ، ئۇ باشتىن ئاخىرى تىبەتنىڭ تولۇق مۇستەقىللىقىنى تەرغىپ قىلىپ، ئۆزى بىۋاسىتە خەلقئارالىق تىبەت مۇستەقىللىق ھەرىكىتى تەشكىلاتىنى بەرپا قىلىپ، ئىنىسى دالاي لامانىڭ "ئوتتۇرا يول". يەنى تىبەتكە ئالىي ئاپتونومىيە ئېلىش سىياسىي يۆنىلىشىگە قارشى تۇرغان. ئۇنىڭ تەرغىپ قىلىشىچە، تىبەتنىڭ بىرلا چىقىش يولى بار بولۇپ، ئۇ بولسىمۇ، مۇستەقىللىق.

تۇپتېن جىگمە نوربۇ 1922 - يىلى تىبەتتە تۇغۇلغان. 1950 - يىللاردىن كېيىن تىبەتتىن ئايرىلىپ، ئۇزۇن مەزگىل ئامېرىكىنىڭ ئىندىئانا ئۇنىۋېرسىتېتىدا تىبەتشۇناس پروفېسسور بولۇپ ئىشلەپ، ئىندىئانادا ياشىغان ئىدى. يېقىندا 73 ياشلىق دالاي لامامۇ ئېغىر ئاغرىپ قالغان بولۇپ، تىبەتلىكلەر ئاكىسىنىڭ ئۆلۈمىنىڭ ئۇنىڭغا روھىي زەربە بولۇشىدىن ئەندىشە قىلىدىكەن، دالاي لاما ئىزچىل ھالدا خىتاي تەرەپ بىلەن سۆزلىشىپ، تىبەتكە ئالىي ئاپتونومىيە ئېلىش ھەمدە تىبەتكە قايتىشنى ئۈمىد قىلغان بولسىمۇ، لېكىن ئىلگىرى ئۆتكۈزۈلگەن سۆھبەتلەر كۆرۈنەرلىك نەتىجە بەرمىگەن.

دالاي لاما ۋەكىللىرى 10 - ئايدا يەنە بىر قېتىم بېيجىڭ بىلەن سۆزلىشىش ئالدىدا تۇرماقتا. بىراق، تىبەتلەرنىڭ ئېيتىشىچە، دالاي لامانىڭ ئاكىسى ئىنىسىنىڭ بېيجىڭدىن سۆھبەت ئارقىلىق مەسىلىنى ھەل قىلىشقا ئۈمىد باغلىماسلىقنى تەۋسىيە قىلغان ئىكەن.