Olimpik mesh'ili qattiq bixeterlik tedbirliri astida lxasadin ötti

Béyjing olimpik tenheriket yighini mesh'ili shenbe küni qattiq bixeterlik tedbirliri astida tibetning paytexti lxasa shehiridin ötti.
Muxbirimiz ömer qanat xewiri
2008-06-21
Share

  Xewerlerge qarighanda, lxasa ning chong kochilirigha yüzligen xitay saqchi we herbiy qisimliri orunlashturulghan bolup, olimpik mesh'ili ötidighan yollar üstidiki pütün dukanlar taqiwétilgen. Peqet alahide tallan'ghan kishilerning olimpik mesh'ilini yetküzüsh pa'aliyitige qatnishishigha ruxset qilin'ghan.

Amérika birleshme agéntliqining xewer qilishiche, mart éyida yüz bergen qozghilangdin kéyin qattiq bixeterlik tedbirliri élin'ghan lxasa shehiri, shenbe küni pütünley qamal qilin'ghan.

Nurghunlighan chet'ellik muxbirlar lxasadiki olimpik mesh'ilini yetküzüsh pa'aliyitige qatnashqan. Lékin xitay hökümiti chet'ellik muxbirlarning olimpik mesh'ilini yetküzüsh pa'aliyitining ichilish we yépilish murasimigha qatnishishighila ruxset qilghan bolup, ular ning tibetlikler bilen ayrim söhbet ötküzüshige we ular bilen ayrim körüshüshige ruxset qilmighan.

Béyjing olimpik mesh'ilining lxasagha yétip kélishtin burun, yeni jüme küni tibet aptonom rayonluq hökümitining mu'awin re'isi palma trili muxbirlarni kütüwélish yighini ötküzüp, mart éyida tibette xitay hökümitige qarshi élip bérilghan naraziliq heriketlirige qatnashqan yene 12 kishi üstidin höküm chiqirilghanliqini we saqchilar teripidin tutulghan 1157 neper tibetlikning qoyup bérilgenlikini bildürgen.

Chet'ellerde pa'aliyet élip bériwatqan tibet teshkilatliri, béyjing olimpik tenheriket yighini mesh'ilining tibettin ötküzülüshini, xitay rehberlirining xitayning tibet üstidiki hakimiyitini tekitlesh üchün élip barghan bir herikiti dep qarap, bu heriketke qarshi chiqmaqta.

Xelq'ara kishilik hoquqni közitish teshkilati, xitay hökümitining lxasada élip barghan olimpik mesh'ilini yetküzüsh pa'aliyitini, tibet mesilsini bir terep qilishni qyinlashturidighan, ziyanliq bir qarar dep körsetti.



Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet