Тибәттә һәрбий қамал давам қилмақта

 Бирқисим сәзгүр дәп қаралған җайларға чәтәллик саяһәтчиләрниң вә мухбирларниң бериши чәкләнмәктә. Франсийә ахбарат агентлиқиниң мухбири тибәтликләрни зиярәт қилғанда, тибәтликләр районниң вәзийити һәққидә сөз ечиштин өзини қачурған. Бир раһиб мухбирниң "сизчә тибәттә муқимлиқ әслигә кәлдиму" дегән соалиға, " шундақ әслигә кәлди һөкүмәт халиғинини қилалаватиду" дәп җаваб бәргән.

Мухбир йәнә аптобус бекәтлиридә, сақчиларниң җиддий тәкшүрүш елип бериватқанлиқини көргән. Йәрлик аһалиләр йәнә 14 ‏ - март ласа вәқәсидин кейин тибәттә зор миқдарда әскәр көпәйтилгәнликини, бу қошунниң узун мәзгил туруп қелишидин әндишә қиливатқанлиқини билдүргән. Тибәт диний даһийси далай лама хитайниң олимпиктин кейин, тибәткә 1 милйон хитай нопуси йөткәшни пиланлаватқанлиқини билдүргән иди.

Олимпик тәйярлиқи вә олимпик мәзгилидә тибәт вә уйғурларниң арқиму - арқа қаршилиқлириға дуч кәлгән хитай һөкүмитиниң олимпиктин кейин өч елиш характерлик зәрбә бериш һәрикәтлирини давамлаштуридиғанлиқи пәрәз қилинмақта.