Dalay lamaning wekilliri bilen xitay terep arisidiki söhbet bashlandi

 B b s agéntliqining shinxu'adin neqil keltürüshiche, bu, 3 - ayda lxasadiki naraziliq heriketliri basturulush bilen kötürülgen tibetlerning omumiy yüzlük qarshiliq heriketliridin kéyin meydan'gha kelgen, xitay hökümiti bilen tibet sürgündiki hökümiti otturisidiki bir qétimliq gheyri resmiy uchrishish bolup hésablinidiken. Elwette, xitay téxi yéqindila dalay lama terep bilen söhbetlishishke teyyar ikenlikini bildürgen idi.

Gerche bu qétimqi söhbetning toluq mezmuni we netijisi téxi élan qilinmighan bolsimu, biraq, hindistanning daramsala rayonidiki tibet hökümitining bayanatchisi bayanat élan qilip, mezkur ikki elchining xitay terepke " hörmetlik dalay lamaning xitay da'irilirining hazirqi weziyetni hel qilish usullirigha chongqur diqqet qiliwatqanliqi yetküzidighanliqi hemde qandaq qilghanda rayondiki tinchliqni emelge ashurghili bolidighanliqi heqqide tekliplerni béridighanliqi" ni bildürgen.

 Shinxu'aning bu heqtiki xewiride éytilishiche, xitay terep xitayning tibettiki siyasetlirini aqlighan hemde ularni bölgünchilik heriketlirini we olimpikke buzghunchiliq qilishni toxtitishqa chaqirghan. Biraq tibet elchilirining néme dégenlikini éytmighan bolup, ikki terep dawamliq söhbetlishish heqqide pütüshken. Lékin, bir qisim tibetler bu söhbettin chong ümid kütkili bolmaydighanliqini bildürüshmekte.

Xitay dölet re'isi xu jintaw yaponiye ziyariti harpisida yapon muxbirlirigha, özining bu qétimqi dalay terep bilen ötküzülgen gheyri resmiy söhbetning aktu'al netijilerge érishishini kütidighanliqini bildürüsh bilen birge yene" dalay terepning musteqilliq we zorawanliq pa'aliyetlirini qozghitishni toxtitishini telep qilidighanliqi" ni eskertken.