Xitay hökümiti dalay lama bilen söhbetni dawamlashturush üchün bezi shertlerni otturigha qoydi

 Xitay tashqi ishlar minstirliqining bayanatchisi chin gang, béyjingda muxbirlargha bergen bayanatida"merkizi hökümet dalay lama terep bilen élip bériwatqan söhbitide semimiy. Dalay lama terep bolupmu, özining heriketliride semimiyet körsetken mezgil ichide bu söhbet dawamlishidu" dégen.

Analizchilarning éytishiche, xitay hökümiti, bundin burunmu bir nechche qétim oxshash teleplerni otturigha qoyghan, bu qétim yene bundaq shertlerni otturigha qoyush arqiliq, söhbetke bir putaq chiqirishqa tirishiwatqan bolushi mumkin iken.

Xitay hökümiti, tibettiki basturush herikitidin kéyin, xelq'ara jama'et bolupmu, gherb döletlirining bésimi bilen tibet mesiliside dalay lamaning wekilliri bilen qaytidin söhbet bashlashqa mejbur bolghan bolup, tibettiki qozghilangdin kéyinki ikki terep otturisidiki tunji söhbet yekshenbe küni xitayning shinjin shehiride élip bérildi.

Xitay hökümiti bilen élip bérilghan söhbetke qatnashqan dalay lamaning wekillirining biri, lodi geri, seyshenbe küni, xongkongda muxbirlargha bergen bayanatida, söhbetning yaxshi ötkenlikini we buning yaxshi bir qedem ikenlikini tekitligen.

Tibet sergerdan hökümitining bayanatchisi tomtan zampel, xitay hökümiti bilen dalay lama wekilliri otturisida élip bérilghan söhbet heqqide bergen bayanatida, tibet mesilisini hel qilish üchün, ikki terep otturisida söhbetning qaytidin bashlan'ghanliqining özi nahayiti ehmiyetlik bir weqe dep körsetti.

Lékin xitay tashqi ishlar minstirliqining bayanatchisi chin gang, seyshenbe küni tibet mesilisi heqqide bergen bayanatida "söhbetning dawamlishishi, dalay lamaning tibetning musteqilliqi üchün élip bériwatqan herikitini we tibette qozghilang chiqirish teshebbusini toxtitishigha qarashliq" dédi.