Sanji türmisining bir xadimi: “Méning türme etritimdila 70 yashtin ashqanlardin 10 nechchisi bar”

Muxbirimiz shöhret hoshur
2022.08.23
Share on WhatsApp
Share on WhatsApp
Sanji türmisining bir xadimi: “Méning türme etritimdila 70 yashtin ashqanlardin 10 nechchisi bar” Sanji türmisining 4-etritide jaza mudditini ötewatqan 79 yashliq xelchem pazil isimlik momay.
Photo: RFA

Yéqinda sanji türmisining ehwalidin xewerdar kishilerdin biri radiyomizgha uchur yollap, mezkur türmining 4-etritide jaza mudditini ötewatqan 79 yashliq xelchem pazil isimlik momayning salametliki xeterlik derijide yamanlashqanliqi, shundaq turuqluq a'ilisige qoyup bérilmigenlikini melum qildi. Muxbirimizning mezkur türmige élip barghan téléfon ziyaretliri dawamida, alaqidar xadimlardin biri, mezkur momay mehbus heqqide melumat bermigen bolsimu, özi mes'ul türme etritide az dégende 70 yashtin ashqa az dégende on nechche mehbus barliqini ashkarilidi.

Ismini ashkarilashni xalimaydighan, weziyettin xewerdar bir kishining inkas qilishiche, sanji türmisining 4-etritide jaza mudditini ötewatqan 79 yashliq momay xelcham pazil, yéqinqi 2 aydin béri salametliki éghir derijide nacharlashqan. Nöwette 4 chaqliq orunduqqa chüshüp qalghan bu momay, öyige qaytip dawalishini telep qilghan bolsimu, lékin türme da'iriliri bu telepni ret qilghan. Biz bu momayning nöwettiki ehwalini éniqlash üchün aldi bilen korlidiki edliye sot-organlirigha téléfon qilduq. Chünki mezkur momayning yurti korla bolup, u korlidin sanji türmisige yötkelgeniken.

Korlidiki bu xadimlar, mezkur momay heqqide melumat bérishni ret qilghandin kéyin, biz uning türkiyediki kélini kifaye xanimdin qéynanisining yéqinqi ehwali heqqide melumat soriduq.

Kifaye xanimning déyishiche, alaqe cheklimisi sewebidin, qéynanisining yéqinqi ehwali heqqide héchqandaq uchur alalmighan. Kifaye xanimning yene déyishiche, qéynanisining 2016-yili mekkige hejge barghan waqtida, yiqilip chüshüp bilikide zeximlinish bolghan we shu zeximini dawalitish üchün, hejdin qaytqan chéghida türkiyede uzun turmastin, yurti korligha qaytqaniken. Kifaye xanim, yuqiriqidin bashqa qéynanisining yéshining chongayghanliqi sewebidinmu salametlikide nacharlishish bolghanliq éhtimalliqini, türmining shara'itlirigha berdashliq bergüdek ehwalda emeslikini eskertti we özining endishide ikenlikini bildürdi.

Téléfonimizni qobul qilghan sanji türmisining bir idare xadimi, xelchem pazilning 4-etrette ikenlikini eskertish bilen birge, uning salametliki heqqide, mezkur etretning mes'ul xadimidinla melumat alalaydighanliqimizni éytti.

Teminlen'gen nomurdiki téléfonni qobul qilghan xadim, deslepte özining aldirashliqini bildürüp, bu heqte jawab bérishtin özini qachurdi. Biz uningdin yashta chonglarning qaysi etrette ikenlikini sorighinimizda, bu türmide yash ayrimisi yoqluqini bayan qildi. Biz uningdin, xelchem pazilning salametlik ehwalining qaysi derijide ikenlikini sorighinimizda, türmide yashta chonglarning köp ikenlikini, shunga melumati yoqluqini bayan qildi.

Ilgirilep soralghan so'allirimizdin kéyin, u özi mes'ul etretning özidila yashta 70 tin halqighanlardin az dégende 10 nechche kishi barliqini ilgiri sürdi.

Xitaydiki 55.wendadaohang.com Toridiki türmige alaqidar matériyalda xitay türmiliride adette bir türme etritide 500, bir türme tarmaq etritide 150 etrapida mehbus bolidighanliqi qeyt qilin'ghan. Buni sanji türmisidiki xadimning uchuri bilen sélishturghanda sanji türmiside yashta 70 tin ashqanlarning sanimu melum nisbetni igilishi mumkin.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.