Xitayning olimpik bixeterlikide xizmet körsetken siyasiy komissar ablikim ghopurmu qamaqta

Muxbirimiz shöhret hoshur
2019-08-20
Élxet
Pikir
Share
Print
2018-Yili 6‏-ayda tutqun qilin'ghan, 2008-yilidiki olimpik mezgilide kuchada yüz bergen qarshiliq heriketlirini basturushta aktip rol alghan ablikim ghopur.
2018-Yili 6‏-ayda tutqun qilin'ghan, 2008-yilidiki olimpik mezgilide kuchada yüz bergen qarshiliq heriketlirini basturushta aktip rol alghan ablikim ghopur.
baike.com

Melum bolushiche, xitayning 2008-yilidiki olimpik mezgilide kuchada yüz bergen qarshiliq heriketlirini basturushta aktip rol alghan we mukapatlan'ghan kucha nahiyelik j x idarisining siyasiy komissari ablikim ghopur, ötken yili 6‏-ayda tutqun qilin'ghan. Anglighuchilirimizdin biri yetküzgen bu uchur, muxbirimizning kucha nahiyesidiki saqchi xadimlirini ziyaret qilishi dawamida delillendi.

Chet'eldiki, ismini ashkarilashni xalimighan kuchaliq muhajirlardin biri, xitayning béyjing olimpiki mezgilide kuchada yüz bergen qarshiliq heriketlirini basturushta aktip rol oynighan we mukapatlan'ghan kucha nahiyelik jama'et xewpsizlik idarisining siyasiy komissari ablikim ghopurning nöwette qamaqta ikenlikini melum qildi. Telefonimizni qobul qilghan kucha nahiyelik j x idarisining bir xadimi özliri siyasiy öginish waqtida körüwatqan saqchi ibret filimida ablikim ghopurningmu barliqini tilgha élish arqiliq uning tutqunda ikenlikini delillidi.

Anglighuchimizdin kelgen inkasta, ablikim ghopurning ilgiri kuchada yüz bergen qarshiliq heriketlirini basturushta aktip rol oynighanliqi we bu seweblik hökümet tereptin mukapatlan'ghanliqi eskertilgen. Mezkur saqchi xadimi sabiq siyasiy komissar ablikim ghopurning ikkiyüzlimichilik bilen eyiblinip tutulghanliqini ashkarilidi. Emma u konkrét qaysi weqe yaki qaysi shexslerge qarita atalmish ikkiyüzlimichilik qilghanliqi heqqide melumat bérelmidi.

"Beydu" uchur ambiridiki ablikim ghopur heqqide qisqa bir tonushturushta ablikim ghopurning olimpik mezgilidiki muqimliq üchün emeliy herikiti arqiliq hesse qoshqanliqi we bu sewebtin "Olimpik ilgharliri" qatarida mukapatlan'ghanliqi qeyt qilin'ghan. Emma olimpik mezgilide qaysi weqe yaki qaysi meydanda xizmet körsetkenliki tilgha élinmighan. Radiyomizning xewer arxiplirida qeyt qilinishiche, 2008-yili 8-ayning 10-küni yeni olimpik bashlinip ikkinchi küni kuchada zenjirsiman partlitish weqesi yüz bergen؛ weqede kucha nahiyelik j x idarisi, baj idarisi we soda sana'et idarisi qatarliq bir türküm hökümet organliri hujumgha uchrighan.

Shinxu'a agéntliqining shu chaghdiki xewiride bayan qilinishiche, mezkur weqede hujumchilar we saqchilar bolup ikki tereptin 11 kishi ölgen we 13 kishi yarilan'ghan. Radiyomizgha uchur yollighan mezkur anglighuchimizning perez qilishiche, ablikim ghopur mana mushu weqede hujumchilarni basturush we ularning a'ile-tawabi'atlirini jazalashta aktip rol alghanliqi üchün eyni chaghda daghdughiliq halda mukapatlan'ghan.

Alaqidar saqchi xadimining ashkarilishiche, bu yil 54 yashqa kirgen ablikim ghopur 2018-yilining otturiliri tutqun qilin'ghan. Emma uning nöwette késilgen yaki késilmigen؛ késilmigen bolsa lagér yaki qamaqta ikenliki melum emes.

Hörmetlik radi'o anglighuchilar, yuqirida, xitayning olimpik bixeterlikide xizmet körsetken siyasiy komissar ablikim ghopurningmu tutqunda ikenliki heqqide anglitish berduq.

Toluq bet