Пүтүн дунядики уйғурлар д у қ ниң 20 йиллиқини тәбриклимәктә

Әнқәрәдин ихтиярий мухбиримиз әркин тарим тәйярлиди
2024.04.18
dunya-uyghur-qurultiyi-20-erkin-aliptekin Дуня уйғур қурултийиниң қурғучи рәиси әркин алптекин дуня уйғур қурултийи қурулғанлиқиниң 20 йиллиқини тәбрикләп сөзләватқан көрүнүш.
Дуня уйғур қурултийи телевизийәси

16-Апрел дуня уйғур қурултийи қурулғанлиқиға дәл 20 йил толған күн.

Буниңдин 20 йил илгири, йәни 2004-йили 4-айниң 16-күни дуняниң һәр қайси җайлирида паалийәт елип бериватқан уйғур тәшкилатлириниң мәсуллири вә вәкиллири германийәниң мюнхен шәһиридә җәм болуп, шәрқий түркистан миллий һәрикитиниң хәлқарадики әң алий оргини болған дуня уйғур қурултийини қуруп чиққан иди. Аридин 20 йил өткән бүгүнки күндә, пүтүн дунядики уйғур җамаәт вәкиллири һәр қайси тәшкилатларниң мәсуллири, тонулған зиялийлар, өлималар вә д у қ ниң сабиқ рәһбәрлири син көрүнүшлүк тәбрик йоллап,  д у қ қурулғанлиқиниң 20 йиллиқини тәбриклимәктә.

Дуня уйғур қурултийиниң рәиси долқун әйса зияритимизни қобул қилип, дуня уйғур қурултийи қурулғанлиқиниң 20 йиллиқиға беғишлап наһайити көп санда язма вә син көрүнүшлүк тәбрикләрниң келиватқанлиқини билдүрди. У, қурултайниң уйғур хәлқиниң қоллишиға, һәр қайси дөләтләрниң вә хәлқара тәшкилатларниң етирап қилишиға еришкәнликини; шуңа дуня уйғур қурултийи қурулғанлиқиниң 20 йиллиқи мәрикисини зор тәйярлиқлар билән өткүзүшкә тәйярлиниватқанлиқини, буниң үчүн уйғур хәлқиниң маддий вә мәниви җәһәттин қоллишини илтимас қилидиғанлиқини тәкитлиди. 

Д у қ ниң муавин рәиси пәрһат муһәммәди әпәнди бу һәқтә телефон зияритимизни қобул қилип мундақ деди: “14-апрел күни германийәниң мюнхен шәһиридики мәркәз ишханисида йиғин чақирип, 5-айниң 3-күнидин 6-күнигичә мюнхенда өткүзүлидиған д у қ қурулғанлиқиниң 20 йиллиқини хатириләш паалийити һәққидә чақириқ елан қилинди. Шундин кейин, дуняниң һәр қайси җайлиридики пешқәдәм устазлиримиз, тәшкилат рәһбәрлиримиз, сиясий паалийәтчилиримиз вә авам хәлқимиз бәс-бәстә қурултайниң мәркәз ишханисиға язма вә син көрүнүшлүк түрлүк тәбрикләрни йоллашқа башлиди. Һазирғичә 50 тин артуқ син көрүнүшлүк тәбрик тапшуруп алдуқ.”     

Пешқәдәм сиясий паалийәтчи вә шаир әхмәт игәмбәрди, америкадики пешқәдәм паалийәтчиләрдин ғоламидин пахта, д у қ ниң қурғучи рәиси болған әркин алптекин, қурултайниң сабиқ рәиси рабийә қадир ханим вә қурултайниң алий мәслиһәтчиси қәһриман ғоҗамбәрди қатарлиқларниң тәбрик видийоси 16-апрел күни тарқитилған. Әркин алптекин әпәнди тәбрикидә мундақ дегән: “дуня уйғур қурултийи қурулғанлиқиниң 20 йиллиқиға мубарәк болсун! қурғучиларниң һәммисини чин йүрәктин тәбрикләймән. Қурултайниң бундин кейинму хәлқимизниң дәрдигә дәрман болидиған чарә-тәдбирләрни издәшни давам қилидиғанлиқиға ишинимән.”

Дуня уйғур қурултийиниң сабиқ рәиси рабийә қадир ханим тәбрикидә мундақ дегән: “дуня уйғур қурултийидики барлиқ сәпдашлирим, барлиқ қериндашлирим вә вәтәндашлирим! уйғур дәвасини дуняниң күнтәртипигә елип киргән вә пүтүн дуняға аңлатқан, уйғур дегән бир милләтниң мәвҗут икәнликини, уйғур дегән бир хәлқниң хитай таҗавузчилириниң астида икәнликини, шундақла уларниң үн-тинсиз қеливатқанлиқини дуняға аңлатқан тәшкилатимиз - дуня уйғур қурултийиниң 20 йиллиқиға мубарәк болсун!”

Австралийәдики әхмәт игәмбәрди әпәнди дуня уйғур қурултийиниң 20 йиллиқини тәбрикләп мундақ дегән: “дуня уйғур қурултийиниң қурулғанлиқиға 20 йил тошти. Бу 20 йиллиқ мусапә җәрянида дуня уйғур қурултийи нурғун ишларни қилип, хәлқимиз ичидә қоллашқа игә болған болса; хәлқарада етирап қилинишқа йүзләнди һәм шуниңға муйәссәр болди.  Қурулғанлиқиниң 20 йиллиқи мунасивити билән дуня уйғур қурултийини чин көңлүмдин тәбрикләймән һәм бундин кейинки ишлириға йәниму зор мувәппәқийәтләрни тиләймән!”

Америкадики пешқәдәм инқилабчи ғуламидин пахта әпәнди тәбрик видийосида дуня уйғур қурултийиға техиму зор утуқ тиләп мундақ дегән: “әзиз қериндашлирим, бүгүн дуня уйғур қурултийиниң қурулғанлиқиға 20 йил толди. Мана шу 20 йил җәрянида, дуня уйғур қурултийи уйғур хәлқиниң қандақ бир милләт болғанлиқини, шәрқий түркистанниң бесивелинған земин икәнликини дуня җамаәтчиликигә аңлитишта зор утуқларни қолға кәлтүрди. Бу утуқлириңларниң бундин кейинму давамлишишини тиләймән!”

Дуня уйғур қурултийи қурулғандин буян вәзипә өтәп келиватқан қәһриман ғоҗамбәрди әпәнди қазақистандики уйғурлар намидин дуня уйғур қурултийи қурулғанлиқиниң 20 йиллиқини тәбрикләп мундақ дегән: “әзиз қериндашлар, һазирқи заман уйғур миллий азадлиқ һәрикитигә йолбашчилиқ ролини ойнаватқан дуня уйғур қурултийиниң 20 йиллиқ тәвәллутини қазақистан уйғурлириниң намидин қизғин тәбрикләймән. Рәис долқун әйса башчилиқидики дуня уйғур қурултийиниң техиму зор утуқларни қолға кәлтүрүшигә тиләкдашлиқ билдүримән!”

Пәрһат муһәммәди әпәндиниң ейтишичә, қисқиғинә бир қанчә күн ичидә дуняниң һәр қайси җайлиридики 50 тәк шәхс вә җамаәт вәкили д у қ қурулғанлиқиниң 20 йиллиқини тәбрикләп видийо йоллиған. Охшимайдиған көз қараш, охшимайдиған кәсип вә саһәләрдики охшимайдиған тәшкилатларниң мәсуллиридин кәлгән тәбрикләрниң һәммисидә дуня уйғур қурултийиниң 20 йил җәрянида қолға кәлтүргән утуқлири көрситип өтүлгән вә юқири баһа берилгән.

Дуня уйғур қурултийи мәсуллириниң ейтишичә, дуняниң һәр қайси җайлиридин кәлгән бу син көрүнүшлүк тәбрикләр “дуня уйғур қурултийиниң 20 йиллиқиға тәбрик вә тиләкләр” дегән сәрләвһә астида дуня уйғур қурултийиниң тор телевизийәси тәрипидин һәр күни тарқитилидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.