Pütün dunyadiki Uyghurlar d u q ning 20 yilliqini tebriklimekte

16-Aprél dunya Uyghur qurultiyi qurulghanliqigha del 20 yil tolghan kün.

Buningdin 20 yil ilgiri, yeni 2004-yili 4-ayning 16-küni dunyaning her qaysi jaylirida pa'aliyet élip bériwatqan Uyghur teshkilatlirining mes'ulliri we wekilliri gérmaniyening myunxén shehiride jem bolup, sherqiy türkistan milliy herikitining xelq'aradiki eng aliy orgini bolghan dunya Uyghur qurultiyini qurup chiqqan idi. Aridin 20 yil ötken bügünki künde, pütün dunyadiki Uyghur jama'et wekilliri her qaysi teshkilatlarning mes'ulliri, tonulghan ziyaliylar, ölimalar we d u q ning sabiq rehberliri sin körünüshlük tebrik yollap,  d u q qurulghanliqining 20 yilliqini tebriklimekte.

Dunya Uyghur qurultiyining re'isi dolqun eysa ziyaritimizni qobul qilip, dunya Uyghur qurultiyi qurulghanliqining 20 yilliqigha béghishlap nahayiti köp sanda yazma we sin körünüshlük tebriklerning kéliwatqanliqini bildürdi. U, qurultayning Uyghur xelqining qollishigha, her qaysi döletlerning we xelq'ara teshkilatlarning étirap qilishigha érishkenlikini؛ shunga dunya Uyghur qurultiyi qurulghanliqining 20 yilliqi merikisini zor teyyarliqlar bilen ötküzüshke teyyarliniwatqanliqini, buning üchün Uyghur xelqining maddiy we meniwi jehettin qollishini iltimas qilidighanliqini tekitlidi. 

D u q ning mu'awin re'isi perhat muhemmedi ependi bu heqte téléfon ziyaritimizni qobul qilip mundaq dédi: “14-Aprél küni gérmaniyening myunxén shehiridiki merkez ishxanisida yighin chaqirip, 5-ayning 3-künidin 6-künigiche myunxénda ötküzülidighan d u q qurulghanliqining 20 yilliqini xatirilesh pa'aliyiti heqqide chaqiriq élan qilindi. Shundin kéyin, dunyaning her qaysi jayliridiki péshqedem ustazlirimiz, teshkilat rehberlirimiz, siyasiy pa'aliyetchilirimiz we awam xelqimiz bes-beste qurultayning merkez ishxanisigha yazma we sin körünüshlük türlük tebriklerni yollashqa bashlidi. Hazirghiche 50 tin artuq sin körünüshlük tebrik tapshurup alduq.”     

Péshqedem siyasiy pa'aliyetchi we sha'ir exmet igemberdi, amérikadiki péshqedem pa'aliyetchilerdin gholamidin paxta, d u q ning qurghuchi re'isi bolghan erkin alptékin, qurultayning sabiq re'isi rabiye qadir xanim we qurultayning aliy meslihetchisi qehriman ghojamberdi qatarliqlarning tebrik widiyosi 16-aprél küni tarqitilghan. Erkin alptékin ependi tebrikide mundaq dégen: “Dunya Uyghur qurultiyi qurulghanliqining 20 yilliqigha mubarek bolsun! qurghuchilarning hemmisini chin yürektin tebrikleymen. Qurultayning bundin kéyinmu xelqimizning derdige derman bolidighan chare-tedbirlerni izdeshni dawam qilidighanliqigha ishinimen.”

Dunya Uyghur qurultiyining sabiq re'isi rabiye qadir xanim tebrikide mundaq dégen: “Dunya Uyghur qurultiyidiki barliq sepdashlirim, barliq qérindashlirim we wetendashlirim! Uyghur dewasini dunyaning küntertipige élip kirgen we pütün dunyagha anglatqan, Uyghur dégen bir milletning mewjut ikenlikini, Uyghur dégen bir xelqning xitay tajawuzchilirining astida ikenlikini, shundaqla ularning ün-tinsiz qéliwatqanliqini dunyagha anglatqan teshkilatimiz - dunya Uyghur qurultiyining 20 yilliqigha mubarek bolsun!”

Awstraliyediki exmet igemberdi ependi dunya Uyghur qurultiyining 20 yilliqini tebriklep mundaq dégen: “Dunya Uyghur qurultiyining qurulghanliqigha 20 yil toshti. Bu 20 yilliq musape jeryanida dunya Uyghur qurultiyi nurghun ishlarni qilip, xelqimiz ichide qollashqa ige bolghan bolsa؛ xelq'arada étirap qilinishqa yüzlendi hem shuninggha muyesser boldi.  Qurulghanliqining 20 yilliqi munasiwiti bilen dunya Uyghur qurultiyini chin könglümdin tebrikleymen hem bundin kéyinki ishlirigha yenimu zor muweppeqiyetlerni tileymen!”

Amérikadiki péshqedem inqilabchi ghulamidin paxta ependi tebrik widiyosida dunya Uyghur qurultiyigha téximu zor utuq tilep mundaq dégen: “Eziz qérindashlirim, bügün dunya Uyghur qurultiyining qurulghanliqigha 20 yil toldi. Mana shu 20 yil jeryanida, dunya Uyghur qurultiyi Uyghur xelqining qandaq bir millet bolghanliqini, sherqiy türkistanning bésiwélin'ghan zémin ikenlikini dunya jama'etchilikige anglitishta zor utuqlarni qolgha keltürdi. Bu utuqliringlarning bundin kéyinmu dawamlishishini tileymen!”

Dunya Uyghur qurultiyi qurulghandin buyan wezipe ötep kéliwatqan qehriman ghojamberdi ependi qazaqistandiki Uyghurlar namidin dunya Uyghur qurultiyi qurulghanliqining 20 yilliqini tebriklep mundaq dégen: “Eziz qérindashlar, hazirqi zaman Uyghur milliy azadliq herikitige yolbashchiliq rolini oynawatqan dunya Uyghur qurultiyining 20 yilliq tewellutini qazaqistan Uyghurlirining namidin qizghin tebrikleymen. Re'is dolqun eysa bashchiliqidiki dunya Uyghur qurultiyining téximu zor utuqlarni qolgha keltürüshige tilekdashliq bildürimen!”

Perhat muhemmedi ependining éytishiche, qisqighine bir qanche kün ichide dunyaning her qaysi jayliridiki 50 tek shexs we jama'et wekili d u q qurulghanliqining 20 yilliqini tebriklep widiyo yollighan. Oxshimaydighan köz qarash, oxshimaydighan kesip we sahelerdiki oxshimaydighan teshkilatlarning mes'ulliridin kelgen tebriklerning hemmiside dunya Uyghur qurultiyining 20 yil jeryanida qolgha keltürgen utuqliri körsitip ötülgen we yuqiri baha bérilgen.

Dunya Uyghur qurultiyi mes'ullirining éytishiche, dunyaning her qaysi jayliridin kelgen bu sin körünüshlük tebrikler “Dunya Uyghur qurultiyining 20 yilliqigha tebrik we tilekler” dégen serlewhe astida dunya Uyghur qurultiyining tor téléwiziyesi teripidin her küni tarqitilidiken.