Social Media
Хитай даирилири корона вирусидин 2019-йили декабирдила хәвәр тапқан болсиму, бу вирус һәққидики учур вә дәлил-испатларни буйруқ чүшүрүп бастуруп қойған.
«Нюйорк почтиси гезити» вә вал стрет журнилиниң хәвәр қилишичә, 2019-йили 10-декабир вухәндики хуаән деңиз мәһсулатлири базирида яймичилиқ қилидиған вей гуйшйән зукамдап қалдим, дәп ойлап йәрлик дохтурханиға кирип көрүнгән вә азрақ дора елип ишиға қайтқан.
Һалбуки, у 8 күндин кейин мәлум бир дохтурханиға биһош дегүдәк һалда давалинишқа елинған.
Хәвәрдә униң «тунҗи корона вируси бимари» болуши мумкинлики илгири сүрүлгән. Вей ханимдин кейин йәнә көплигән бимарлар охшаш аламәтләр билән давалинишқа елинған. Һалбуки, буларниң көпинчилири әслиһәлири начар, кичик дохтурханиларда көрүнгән. Бәзилири пулини қиммәт көрүп өпкисини рентгенға елишини, яки вей ханимға охшашла чоңрақ дохтурханиларға беришни халимиған.
Дохтурлар декабирниң ахири буларниң һәммисиниң хуаән деңиз мәһсулатлири базири билән мунасивәтлик икәнликини дәлилләп чиққан вә вей ханим қатарлиқ көплигән бимарларни карантин астиға алғандин кейин, әһвалдин юқирини хәвәрдар қилған.
«Нюйорк почтиси гезити» ниң хәвәр қилишичә, 3-январ хитай дөләтлик сәһийә комитети бу һәқтики учурларни контрол қилиш вә дәлил-испатларни йоқитиш һәққидә буйруқ чүшүргән.
Дуня сәһийә тәшкилатиму корона вируси һәққидики учурлардин 31-декабирға кәлгәндә андин вақипландурулған. Хитай һөкүмити мәзкур кесәлни тунҗи давалиған дохтурларниң мәҗбурий еғизни әткән.
Бу әҗәллик вирус һәққидики хәвәр-учурлар 20-январғичә җамаәттин йошурун тутулған. 23-январға кәлгәндә пүткүл вухән шәһәри карантин астиға елинип, вухәнгә кирип-чиқиш чәкләнгән.
Нөвәттә бу вирус дуняниң һәммә җайлириға дегүдәк тарқалған вә 29-мартқичә 691 миң 867 адәмни юқумландурған, 32 миң 988 адәмниң җениға замин болған.
«Вал стрет журнилини» ң зияритини қобул қилған вей ханим кейин өзиниң сақийип дохтурханидин чиққанлиқини, әмма хитай һөкүмити бурунрақ һәрикәт қилған болса, бунчә җиқ адәмниң өлүп кәтмигән болғанлиқини ейтқан.
