Xébéyda 400 ming adem qattiq cheklime astigha élighan

Muxbirimiz jüme
2020-06-28
Share
Korona-Xebei-2020.png "Asiya xewer qanili" ning körsitishiche, xébéyda 400 ming adem qattiq cheklime astigha élighan.
channelnewsasia.com

Korona wirusi béyjing we xitayning bashqa jaylirida qayta bash kötürüshke bashlighandin kéyin, 28-iyun xitay da'iriliri xébéy qatarliq jaylarda 400 ming ademni qattiq cheklime astigha alghan.

"Asiya xewer qanili" ning körsitishiche, hökümet da'iriliri weziyetning "Éghir we murekkep" ikenlikini bildürgen.

Eng deslep xitayning wuxen shehiride bashlan'ghan korona wirusi dunya boyiche yekshenbe künigiche 10 milyon ademni yuqumlandurghan, 500 minggha yéqin adimining jénigha zamin bolghan.

Halbuki, xitay da'iriliri bu wirusning özidin bashlan'ghanliqini izchil ten almighanning üstige wirusni kontrol astigha alghanliqini hedep teshwiq qilip kéliwatqan idi.

Emma shundaqtimu mezkur wirus 11-iyun béyjing shehiride qayta bayqalghandin buyan peqet béyqingdila hazirqigha kelgüche 297 ademni yuqumlandurghan.

14-Iyun béyjingdiki yuqumdarlar deslepte bayqalghanliqi mölcherlen'gen shinfadi yéza igilik mehsulatliri top tarqitish baziri taqalghan. 

Melum bolushiche, béyjingdin 140 kilométir yiraqliqtiki xébéy ölkisining enshin nahiyesi béyjing shinfadi yéza igilik mehsulatlirini top tarqitish bazirini yéngi béliq bilen teminleydighan bazilarning biri iken.

"Jenubiy xitay seher géziti" ning xewer qilishiche, enshin nahiyeside korona wirusi ikkinchi qétim qozghilip hazirgha kelgüche 13 ademde bayqalghan. Netijide da'iriler enshin nahiyesini toluq taqighan.

Xewerde körsitishiche, yekshenbe kündiki taqash buyriqidin kéyin, nahiyege kirip-chiqish pütünley cheklen'gendin bashqa, nahiyege qarashliq yéza-mehellilerge bérip-kélishmu toxtitilghan, mehelle we binalarmu taqalghan. Bir künde her bir a'ilidin birla ademning sirtqa chiqishigha ruxset qilin'ghan. 

Bu xildiki cheklimilerning qachan'ghiche dawam qilidighanliqi namelum.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.