Shiwétsiyede 5-iyul ürümchi weqesining 4 yilliqi daghdughiliq namayish bilen xatirilendi

5 - Iyul ürümchi weqesining 4 yilliq xatire künide shiwétsiyediki Uyghur jama'etchilikining xitaygha qarshi namayish sadaliri sitokholm shehirini lerzige keltürdi. Jüme küni chüshtin kéyin sa'et 2 de shiwétsiye parlamént binasining aldigha toplan'ghan zor kölemdiki Uyghur jama'etchiliki shiwétsiyediki insan heqliri teshkilati we qérindash türk jem'iyetliri wekilliri bilen bille xitaygha qarshi namayishqa teyyarlandi.

Bu qétimliq birleshme namayishni shiwétsiye Uyghur ma'arip uyushmisi bilen shiwétsiye Uyghur komitéti öz - ara hemkarliship birlikte teshkillidi. Namayish riyasetchiliridin abdulla ependi köpchilikke söz qilip bu qétimqi namayishning muhim küntertiplirini aldin uqturup ötti.

Parlamént aldida bashlan'ghan namayish köpchilikning xitay hökümitige qarshi sho'ar sadaliri bilen ewjige kötürüldi. Namayishni uyushturghan shiwétsiyediki ikki Uyghur teshkilatining mes'ulliridin nijat turghun bilen abdushükür samsaqlar söz qildi. Péshqedem Uyghur ziyaliyliridin faruq akimu köpchilikke sözge chiqip bu qétimliq namayishning ehmiyitini tekitlidi.

Bir sa'ettin kéyin namayishchilar qoshuni sep bolup parlamént aldidin ayrilip sheher ichini boylap xitay elchixanisigha yürüsh qildi. Namayish taki chüshtin kéyin sa'et 6 giche xitay elchixanisining aldidiki kengri chimliq meydanda ötküzüldi. Shiwétsiyening “Kündilik xewerler” gézitining muxbirliri bilen “Türk xeber ajénsi” ning muxbirliri neq meydandin namayishni xewer qildi. Namayishqa ata - aniliri bilen bille qatnashqan shiwétsiyediki Uyghur balilar qollirida ay - yultuzluq kök bayraqni tutqan halda sho'ar towlap etraptiki sheher xelqige chongqur tesirat béghishlidi.