Мәрһум дини алим абдулһәкимхан мәхсум һаҗимниң җиназа намизи оқулди

Ихтиярий мухбиримиз арслан
2016-12-23
Елхәт
Пикир
Share
Принт
Мәрһум дини алим абдулһәкимхан мәхсум һаҗимниң җиназа намизи оқулмақта
Мәрһум дини алим абдулһәкимхан мәхсум һаҗимниң җиназа намизи оқулмақта
RFA/Arslan

Шәрқий түркситан маарип вә һәмкарлиқ җәмийитиниң қурғучиси дини алим абдулһәкимхан мәхсум һаҗим 2016-йили 12-айниң 22-күни туюқсизла вақитсиз бу дуня билән видалашти. 12-Айниң 23-күни мәрһумниң җиназа намизи зәйтинбурну аминә инанч җамидә оқулди вә зәйтинбурдики козлу мазарлиқиғида йәрликигә қоюлди.

Мәрһумниң җиназа намизини оғли абдусалам қарим имам болуп оқуди. Җиназа намизиға, түркийәдики һәр қайси җайлиридики уйғур тәшкилатниң рәһбәрлири, дини өлималар, доктур-профессурлар, зиялийилар, яшлар вә уйғурларниң достлири болуп 2000 әтрапида киши қатнашти.

Җиназа намизиға йәнә зәйтинбурну шәһәр башлиқи мурат айдин, сабиқ парламент әзаси җалал әрбай, түркийә баш министирниң мәслиһәтчиси өмәр фаруқ қорқмаз, дуня уйғур қурултийиниң муавин рәиси сийт тумтүрк, явро-асия түрк җәмийәтләр федератисийәсиниң рәиси исмаил җенгиз қатарлиқ рәһбәрләрниң қатнишиши билән биргә мәрһумниң дуняниң һәр қайси җайлиридини сәпдашлири һәм оқуғучилири шундақла германийә, шветсийә, норвигийә, голландийә, сәудий әрәбстан, қазақистан қатарлиқ дөләтләрдин бир түркүм уйғур вәкилләрму қатнашти.
abdulhekimxan-mexsum-jinaza-istanbul-turkiye-2016-2.jpg
Җиназа намизи мурасимида мәрһумниң оғли абдусалам тәклимакан қисқичә сөз қилип дадиси абдулһәкимхан мәхсумдин җамаәтниң рази болуп кетишини, әгәр мадди мәнивий муамилиси болса өзиниң беридиғанлиқини билдүрди. Җамаәт бирдәк рази болдуқ, деди.

Шәрқий түркистан маарип һәмкарлиқ җәмийити рәиси һидайитулла оғузхан, шәрқий түркистан өлималар бирлики рәиси атавулла шаһяр қатарлиқлар мәрһум һәққидә қисқичә тохтилип өтти.

Шәрқий түркситан маарип вә һәмкарлиқ җәмийитиниң рәиси һидайәтулла оғузхан сөз қилип абдулһәкимхан мәхсум һаҗимниң һаят-иш излири тоғрисида тохталди.
abdulhekimxan-mexsum-jinaza-istanbul-turkiye-2016-3.jpg
Һидайәтулла оғузхан сөзидә, абдулһәкимхан мәхсум һаҗимниң һаяти бойичә уйғурларни иттипақлаштуруш, бирлик һасил қилишқа тиришчанлиқ көрситип кәлгәнликини, һәр заман уйғур мусулманларниң зулумдин қутулуши үчүн хизмәт қилип кәлгәнликини, униң мирас қалдуруп кәткән йолдин меңиш һаят қалғанларниң үстигә йүкләнгән бир вәзипә дәп билидиғанлиқи вә мәрһумниң йолида меңип вәтән хәлқ үчүн нәтиҗилик хизмәтләрни қилишқа тәйяр икәнликини ипадилиди.

Профессор җәлал әрбайниң мәрһум һәққидики тәсирлик дуасидин кейин еригән қәлбләр, яшланған көзләр, ғәмкин вә мусибәтлик вуҗудлар йеғиватқан ямғурға қаримастин устазниң җиназисини қолму-қол көтүрүп тәкбир садалири ичидә бир километирдин артуқ йәргичә елип келишти.

Җиназа намизи зәйтинбурнудики козлу қәбристанлиқиға елип берилди. Мәрһумни йәрликигә қоюш җәриянида қуран тилавәт қилинди, роһиға дуа оқулди. Дини алим ибраһим дамоллам қәбрә бешида мәрһумға хитаб қилип йүрәк сөзлирини аңлатти. Ибраһим дамолламниң тәсирлик сөзлириниң аңлиған қәбрә бешидикиләр йиға-зар қилишип көз-яшлирини туталмиди. Мәрһумниң гунаһлириниң мәғпирәт, ятқан йериниң җәннәттә болуши үчүн дуа қилди.
abdulhekimxan-mexsum-jinaza-istanbul-turkiye-2016-4.jpg
Ибраһим дамоллам сөзидә йәнә мәрһумниң бир арзуси болса уйғурлар арисида бирликни қолға кәлтүрүп, күч һасил қилиш икәнликини оттуриға қойди вә уни әмәлгә ашуруш үчүн вәдә бәрди вә кишиләрдин вәдә алди.

Дәпинә ишлири тамлиғандин кейин шәрқий түркистан маарип вә һәмкарлиқ җәмийитиниң зәйтинбурну шөбисидә йиғилип дуа тилавәт қилинди. Дуняниң һәр қайси җайлиридин кәлгән уйғур вәкилләр мәрһум тоғрисида йүрәк сөзлирини баян қилишти.

Сәудий әрәбистандин җиназа намизиға кәлгән уйғур мөтивәрлиридин сираҗидин әзизи әпәнди сөз қилип, мәрһум тоғрисида тохталди вә сәуди әрәбистандики уйғурларниң саламини елип кәлгәнликини билдүрди.

Толуқ бәт