Méral akshener abduréhim héytning türkiyede dawalitilishi kéreklikini bildürdi

Türkiyediki chong öktichi partiyelerdin bolghan “Iyi” partiyesi bashliqi méral akshener dangliq xelq naxshichisi we muzikant abduréhim héytning türkiyede dawalitilishi kéreklikini bildürdi.

Méral akshener 12-féwral seyshenbe küni “Iyi” partiyesining omumiy yighinida türkiyening küntertipidiki muhim mesililer heqqide qilghan sözide abduréhim héyt heqqide mexsus toxtaldi. U hepte axirida xelq naxshichisi abduréhim héytning xitaydiki türmide wapat bolghanliqi heqqide xewer tarqalghanda nahayiti azablan'ghanliqini, bu uchurni qattiq sürüshtürgenlikini bildürdi. Méral xanim kéyin abduréhim héytning téxi hayatliqi ashkarilan'ghan bolsimu, biraq uning salametlikining nacharliship ketkenliki heqqide melumatlar barliqini tilgha élip: “Men partiye ichidiki guruppa hey'et bashliqliri we parlamént ezaliridin derhal bir hey'et teshkillep hökümettin telep qilish, hetta zörür bolsa ta xitayghiche bérish arqiliq uni türkiyede dawalashni qolgha keltürüshni telep qilimen” dédi.

Uning bu sözidin kéyin zal ichide qizghin alqish sadaliri yangridi. Méral akshener xanim sözi dawamida, xitay hökümitining Uyghur élide yürgüzüwatqan “Qoshmaq tughqan” siyasitinimu tilgha élip turup, Uyghurlarning öylirige xitay erlirining orunlashturuluwatqanliqi we buning qobul qilghusiz bir ehwalliqini tilgha aldi.

Méral akshener xanim sözi dawamida yene, abduréhim héytning naxshisining misraliridin neqil élip turup, özining abduréhim héyitqa salametlik we sebre tileydighanliqini ipade qildi shundaqla türkiye hökümitini bu mesilide aktip heriket qilishqa chaqirdi.

Uyghur élide yolgha qoyuluwatqan lagér tüzümige qarita sükütte turghan türkiye hökümiti axiri 9-féwral küni sükütini buzghan we xitay hökümitini Uyghur élide yolgha qoyghan jaza lagérlirini taqashqa chaqirghan idi. Türkiye tashqi ishlar ministirliqi 9-féwral künidiki bayanatida, 21-esirde jaza lagérlirining qaytidin otturigha chiqishi, shundaqla xitayning Uyghur türklirige élip bériwatqan sistémiliq assimilyatsiye siyasitini “Insaniyet üchün nomus” dep körsetken.

Xitay tashqi ishlar ministirliqi bolsa türkiyening bu bayanatidin qattiq narazi bolup, türkiye tashqi ishlar bayanatchisining pozitsiyesini “Nahayiti qebih” dep eyibligen idi.