Almatada azadliq, erkinlik, kishilik hoquqi üchün shéhit bolghanlar eslendi

6 - Mayda almata shehirining sultanqorghan mehellisi kafiyxanilirining birige jem bolghan Uyghur jama'etchiliki qur'an oqup, azadliq, erkinlik, kishilik hoquqi üchün shéhit bolghan qérindashlirini eslidi.

Melumki, yéqinda fransiye paytexti parizhda ötken 6 - nowetlik Uyghur xanim - qizlirini démokratiye we insan hoquqi bilimliri boyiche terbiyilesh kursigha qatnashqan ayallarning omumiy yighinida “Dunya Uyghur ayallar birliki” tesis qilinip, uningda teshkilat re'isi we uning jay - jaylardiki mu'awinliri saylan'ghan idi.

Xatire pa'aliyitide doklat bilen sözge chiqqan dunya Uyghur ayallar birliki re'isining ottura asiya boyiche mu'awin re'isi asiyem turdiyéwa mezkur kursning rohini yighin qatnashquchilirigha yetküzdi. Buningdin tashqiri sözge chiqquchilar bu qétimqi kursning meqset, wezipiliri we ehmiyiti, Uyghur xanim - qizlirining milliy ma'aripni, medeniyetni rawajlandurushtiki, yash ewlatlarni terbiyileshtiki rolini, omumen Uyghur milliy herikitide tutqan ornini, shundaqla birlik, ittipaqliqning muhimliqini alahide tekitlidi.

Shuningdek, yighinda söz alghan dunya Uyghur qurultiyining qazaqistandiki alahide wekili, siyasetshunas qehriman ghojamberdi bolupmu maralbéshi nahiyisi sériqbuya kentide saqchilar we yerlik ahaliler otturisida yüz bergen toqunushning kélip - chiqish seweblirini we aqiwetlirini tepsiliy chüshendürdi.

U, saqchilar teripidin körsitilgen haqaretke chidimighan Uyghurlarning, naraziliq bildürginide qanunsiz oqqa tutulghanliqini, shuning bilen kent ahalisining ushtumtut qozghilishida xitay hökümitining qutratquluq rol oynighanliqini körsetken. U shundaqla weqe seweblirini chüshendürüp: “Bu, xitayning Uyghuristandiki mustemlike siyasitining aqiwiti. Yeni, béyjingning Uyghuristanda ilgiri sürüwatqan “Qosh tilliq ma'arip”, köchmen yötkesh, pilanliq tughut, diniy cheklesh, mejburiy assimiliyatsiye qilish, insan hoquqini depsende qilish siyasitining netijisi. Mezkur siyaset özgermigiche Uyghurlarning qarshiliqi we öz teqdirini özi erkin belgilesh qanuniy herikiti küchiyiwéridu” dédi.

Radi'omiz ziyaritini qobul qilghan almata shehiri turghuni sheherbanum seydulla'éwa mezkur murasim heqqide qarishini otturigha qoydi.