Amérikidiki xitay elchixanisi aldida Uyghur - tibet birleshme namayishi ötküzüldi

Xitay hökümitining “1 - Öktebir dölet bayrimi” küni munasiwiti bilen amérikidiki Uyghur, tibet, mongghul qatarliq milletlerdin bolghan muhajirlar amérikining paytexti washin'gtondiki xitay elchixanisi aldigha toplinip, özlirining xitay ishghaliyitidiki Uyghurlar diyari, tibet, ichki mongghuliye qatarliq jaylardiki insan heqlirining depsende qilinishigha bolghan küchlük naraziliqini bildürdi.

Dunya Uyghur qurultiyi her yili “1 - Öktebir” ning Uyghurlar üchün “Matem küni” bolidighanliqini élan qilghan bolup, dunyaning herqaysi jayliridiki Uyghur jama'iti bu künde her xil shekillerdiki naraziliq pa'aliyetlirini teshkillesh arqiliq özlirining xitay hökümitige bolghan ghezipini ipadilep kelmekte. Bu yilmu amérikidiki Uyghur jama'iti amérika Uyghur birleshmisining biwaste oronlashturushi arqisida 30 - séntebir küni chüshtin kéyin washin'gtondiki xitay elchixanisi aldigha toplinip öz naraziliqini ipadilidi.

Bu qétimqi namayishning ötken yillardikidin perqliq bolghan bir yéri shuningdiki, xitay hökümitining siyasiy, iqtisad we medeniyet jehettiki zulumlirigha oxshash derijide uchrawatqan Uyghur, tibet, mongghul qatarliq xitay bolmighan milletlerning amérikidiki muhajir topluqliri estayidil meslihetlishish arqiliq bu yilqi namayishni birleshme namayish sheklide wujudqa chiqirishqa kélishken iken.

Bügün xitay elchixanisining aldi qaynam tashqinliqqa tolghan bolup, Uyghur muhajirlirining qolliridiki ay yultuzluq kök bayraqlar, shuningdek tibetler we mongghullarning bayraqliri hemde alaqidar lozunkilargha jör bolghach kökni titretken sho'ar sadaliri ajayip hayajanliq menzire hasil qilghan idi. Amérika Uyghur birleshmisining re'isi élshat hesen ziyaritimizni qobul qilip, Uyghurlar diyaridiki siyasiy weziyetni közde tutqanda bügünki namayishning tolimu zor ehmiyetke ige ikenlikini bildürdi.

Namayishqa ishtirak qilghanlar ichide Uyghur insan heqliri qurulushi teshkilatining mes'ulliridin zubeyre xanim ziyaritimizni qobul qilip, Uyghurlarning xitay ishghaliyitidiki bashqa milletlerge oxshashla éziliwatqanliqini tekitlidi. U,bu qétimqi birleshme namayishta hés qilghanlirigha birleshtürgen halda Uyghurlar bilen tibetler, shundaqla mongghullarning alaqidar pa'aliyetlerde hemkarliq rohini jari qildurushining muhimliqini tekitlidi. Uningche mushu xildiki hemkarliq pa'aliyetliri qanche köp bolsa, uning xitay hakimiyitige béridighan zerbisimu shunche küchlük bolidiken. U bu heqte mundaq dédi.

Namayishqa ishtirak qilghan Uyghur yashliridin perhat özining hör dunyadiki mushundaq bir namayishqa qatnishalighanliqidin pexirlinidighanliqini éytip, öz tesiratlirini biz bilen ortaqlashti.

Sho'ar towlash tamam bolghandin kéyin namayish ishtirakchiliri sep bolup tizilip, téximu köp kishilerge öz awazini anglitish üchün dupont aylanmisigha yürüsh qildi.