Anatoliyediki üch sheherde Uyghurlarni qollash namayishi ötküzüldi

Yéqindin buyan bolup, 28 - iyul yeken weqesidin kéyin türkiyening herqaysi wilayet, sheher we nahiyeliride xitaygha qarshi naraziliq bildürüsh, Uyghurlargha hésdashliq bildürüsh pa'aliyetliri qanat yaymaqta.

8 - Ayning 15 - küni türkiyening qiriqqale, siwas we tokat qatarliq üch chong wilayitining merkez sheherliride birla waqitta xitayning Uyghurlargha élip bériwatqan bésim siyasitige naraziliq we Uyghurlargha hésdashliq bildürüsh pa'aliyetliri ötküzüldi. Bu pa'aliyetler bu sheherlerning eng muhim kocha we meydanlirida ötküzülgen bolup, bu pa'aliyetke köp sanda ammiwi teshkilat, siyasiy partiye we amma qatnashmaqta.

8 - Ayning 15 - küni türkiyening eng chong wilayetliridin biri bolghan siwas wilayitining merkizi siwas shehiridimu xitaygha qarshi naraziliq namayishi ötküzüldi. Türkiye kadirlar uyushmisi, türkiye mezlumlar teshkilati qatarliq 58 ammiwi teshkilatning wekilliri qatnashqan bu namayish mewlane kochisida ötküzülgen bolup, namayishqa 500 etrapida kishi qatnashqan.

www.haberler.com Tor bétide élan qilin'ghan xewerge asaslan'ghanda, namayishta metbu'at bayanatini oqup ötken türkiye kadirlar uyushmisi siwas shöbisi mes'uli muhammet aliy gench ependi dunyaning nurghun jaylirida musulmanlargha qarita qirghinchiliq élip bériliwatqanliqini, dunya döletlirini buni derhal toxtitishqa chaqiridighanliqini, bolupmu türkiye hökümitini qérindash Uyghur xelqige ige chiqishqa chaqiridighanliqini bayan qilin'ghan.

Uyghurlar toghrisida élip bérilghan üchinchi chong pa'aliyet 8 - ayning 15 - küni türkiyening tokat wilayitide ötküzülgen. Tokat oqutquchilar uyushmisi sherqiy türkistan we pelestindiki musulmanlargha yardem yighish üchün ötküzgen bu pa'aliyet tokat shehirining merkizige jaylashqan jumhuriyet meydanida ötküzülgen. Bu pa'aliyet toghrisida muxbirlargha bayanat bergen oqutquchilar uyushmisi mes'uli sibel yetkin xanim, bügün ghazze we sherqiy türkistandiki musulmanlargha yardem yighish pa'aliyiti bashlatqanliqini bayan qilip ötken. U bayanatida türk xelqini Uyghurlargha iqtisadiy jehettin yardem qilishqa chaqirghan.

Bulardin bashqa türkiyede pa'aliyet élip bériwatqan siyasiy partiye, ammiwi teshkilat we meshhur zatlar ijtima'iy taratqularda bayanat élan qilip, xitayning Uyghurlargha élip bériwatqan bésim siyasitini eyiblimekte. Türk xelqi we türk hökümitini Uyghurlargha yardem qilishqa chaqirmaqta. Mutexessisler bu xil pa'aliyetlerning türkiye boyiche qanat yéyishining türkiye hökümitini Uyghur mesilisige téximu köp köngül bölüshke mejburlaydighanliqini ilgiri sürmekte