خىتاي تەرەپدارى ئابلىمىت سادىق ئاۋسترالىيەدىكى چاغان كېچىلىكىنى تەشكىللەشتە رول ئالغانلىقىنى يوشۇرمىدى

ئىجتىمائىي ئاخبارات ۋاسىتىلىرىدە ئاۋسترالىيەدە بايراق چىقىرىش ۋەقەسى يۈز بەرگەن شىنجاڭ فېستىۋالىنىڭ ئۆتكۈزۈلۈشىدە، ئاۋسترالىيەدىكى «شىنجاڭلىقلار جەمئىيىتى» نىڭ، جۈملىدىن بۇ جەمئىيەتنىڭ غوللۇق ئەزاسى، ئابلىمىت سادىق دېگەن كىشىنىڭ مۇھىم رول ئوينىغانلىقى خەۋەر قىلىنغان ئىدى. بۈگۈن مۇخبىرىمىز مەزكۇر شەخس ئابلىمىت سادىق بىلەن سۆھبەت ئېلىپ باردى. سۆھبەتتە ئابلىمىت سادىق ئۆزىنىڭ «شىنجاڭلىقلار جەمئىيىتى» نىڭ ئەزاسى ئىكەنلىكىنى رەت قىلدى، ئەمما مەزكۇر كېچىلىكنىڭ ئۆتكۈزۈلۈشىدە ئۆزىنىڭ تەكلىپكە بىنائەن «شىنجاڭلىقلار جەمئىيىتى» ۋە خىتاي ئەلچىخانىسىغا يېقىندىن ماسلاشقانلىقىنى يوشۇرمىدى.

ئاۋسترالىيە ئۇيغۇر جەمئىيىتى رەئىسىنىڭ بىلدۈرۈشىچە، ئاۋسترالىيەدە 5000دىن ئارتۇق ئۇيغۇر بار، بۇنىڭ ئىچىدە ئابلىمىت سادىققا ئوخشاش خىتاي تەرەپدارلىرىنىڭ سانى 10 - 20 ئەتراپىدا. ئارتىس ئابلىمىتنىڭ بايانلىرى، چەتئەلدىكى خىتاي تەرەپدارى بىر ئۇيغۇرنىڭ تۇنجى قېتىم رادىيومىزدا ئۆز پىكرى ۋە مەيدانىنى ئاشكارا بايان قىلىشى بولۇپ ھېسابلىنىدۇ.