B d t de Uyghur mesilisi yene bir qétim otturigha qoyuldi

B d t kishilik hoquq kéngishining 28 - nöwetlik da'imiy yighinida Uyghurlar duchar boluwatqan insan heqliri depsendichiliki otturigha qoyuldi.

13 - Mart küni chüshtin kéyin b d t ning jenwediki zalida ötküzülgen da'imiy yighinda dunya Uyghur qurultiyigha wakaliten pétér iwén ependi söz qlip Uyghurlar duchar boluwatqan insan heqliri depsendichilikini anglatqan. U nutqida xitayning 2005 - yili kirgendin kéyinmu 2014 - yilidikige oxshashla qattiq basturush, tutqun qilish, öltürüsh heriketlirini dawam qiliwatqanliqini, 2014 - yili sherqiy türkistanda Uyghurlargha élip bériwatqan basturush siyasitining dehshetlik bir tüs alghanliqini, atalmish shinjang Uyghur aptonom rayon bash teptishining 2014 - yilida 27 ming 600 nechche kishini qolgha élip wezipini 2013 - yilidikige qarighanda 95% ashurup orunlighanliqini jakarlighanliqini misal qilip turup anglatqan. U b d t kishilik hoquq kéngishining 28 - nöwetlik da'imiy yighinida qilghan nutqida yene, xitay dölitining Uyghurlarning ana tilini ishlitish huquqini qolidin tartiwalghanliqini, ilham toxti qatarliq ziyaliylarni Uyghurlarning qanuniy heqlirini qoghdighanliqi üchünla türmige tashlighanliqini we xitay hökümitining Uyghurlargha qaritilghan bésim siyasitini kündin - kün'ge kücheytip yürgüzüwatqanliqini otturigha qoydi.

13 - Mart küni dolqun eysa ependi birleshken döletler teshkilatining alahide wekili héyinér béyléféld ependini ishxanisida ziyaret qilip xitayning Uyghurlargha qarita élip bériwatqan bésim siyasitini eyiblep bergen bayanati üchün dunya Uyghur qurultiyigha wakaliten rehmet éytti.

Kéyin xitay hey'iti söz qilip d u q hey'itining bayanlirini ret qildi.

D u q ijra'iye komitéti mudiri dolqun eysa ependi bilen pétér iwén ependining bügünki pa'aliyiti nahayiti ghelibilik ötken bolup, muxbirimiz téximu tepsiliy melumat élish üchün dolqun eysa ependi bilen téléfon söhbiti élip bardi.