Bishkekte sen'etchi rushen'gül möminiwa maharet körsetti

Naxshichi rushen'gül möminiwa qirghizistanning sabiq prézidénti roza otunbayiwa bilen bille

Qirghizistan Uyghurliri “Ittipaq” jem'iyitining yar - yülekte bolushi we qollap - quwetlishi bilen 29 - féwiral küni bishkektiki qirghizistan döletlik tiyatirxanisida ataqliq rawap mahiri,naxshichi rushen'gül möminiwaning yalghuz kishilik sen'et kéchiliki ötküzüldi.

Yash sen'etkar rushen'gül qirghizistanning qara balta shehiridiki oqumushluq ziyaliy a'iliside dunyagha kelgen bolup, özining sen'etke bolghan qiziqishi we péshqedem sen'etkarlarning qitiqinip ögitishi bilen yaramliq bir rawap mahiri hemde özige xas uslup yaratqan naxshichi bolup yétishken.

Sen'et kéchiliki harpisida radiyomiz ziyaritini qobul qilghan rushen'gül özining sen'et hayati heqqide tüwendikilerni bildürdi: “Kichik waqtimda, dadamning méning qolumdin yétilep shu chaghlarda qara balta shehiride qurulghan Uyghurlarning sen'et kursigha élip barghini hélimu ésimde. Men deslepte dutar, kéyin rawap ügen'gen idim.”

“Ittipaq” jem'iyitining uyushturushi bilen rushen'gül xanim 2013 - yili qirghizistandiki bir türküm sen'etxumar Uyghur yashliri terkibide özlirining kespiy sewiyesini yuqiri kötürüsh üchün Uyghur ilining ürümchi shehiridiki sen'et inistitotigha bir yilliq bilim ashurushqa éwetilgen idi. Rushen'gül özining ürümchide ötken bir yilliq öginish jeryanini esligende hayajan ichide mundaq didi: “Biz burun nota dégenni bilmeyttuq. Bu qétim ürümchide biz nota öginish bilen birlikte, muzikida milliy puraq bolmisa bolmaydighanliqini hem öginip kelduq.”

Sen'et kéchiliki ottura asiyada tonulghan ataqliq naxshichi ayturghan hesen, qirghizistan xelq artisi sultan kérim qatarliqlarning shox, yangraq naxshiliri bilen bashlandi.

Yaponiyening qirghizistandiki bash elchisi hemde ezerbeyjan qatarliq döletlerning elchixana xadimliri, qirghizistan parlaméntining ezasi perhat tölendiyiw qatarliqlar méhmanlarmu Uyghur jama'etchiliki bilen birge oyun kördi.

Bu qétimqi sen'et kéchilikining rézhissori perhat ibrahim rushen'gülning bedi'iy talantigha alahide yuqiri baha bérip munularni bildürdi: “Rawap chélish mahariti jehette qirghizistanda rushen'gülning aldigha ötidighini yoq dep qaraymen. U özining tirishchanliqi bilen bügünkidek yüksek netijilerge yétishti.”

Sen'et kichilikide yene almatadin kelgen “Waytang” sen'et guruppisining artistliri özlirining qiziqarliq sen'et numurliri bilen tamashibinlargha xoshalliq béghishlidi.