Dolqun eysa türkiye dölet rehberliri bilen körüshüp Uyghurlar mesilisini anglatti

Dunya Uyghur qurultiyining re'isi dolqun eysa türkiye ichki ishlar ministiri süleyman soylu ependim bilen birge. 2018-Yili 16-féwral. Myunxén, gérmaniye.

Dunya Uyghur qurultiyining re'isi dolqun eysa türkiye ichki ishlar ministiri süleyman soylu ependim bilen birge. 2018-Yili 16-féwral. Myunxén, gérmaniye.

16-Féwral chüshtin kéyin duqning re'isi dolqun eysa ependi myunxénda chaqirilghan “54-Nöwetlik dunya xewpsizliki muhakime yighini” gha qatnishish üchün kelgen türkiyening bash ministiri binali yildirim we ichki ishlar ministiri süleyman soylu bilen ayrim-ayrim körüshüp, Uyghurlar mesilisini anglatqan.

Melum bolghinidek, “54-Nöwetlik dunya xewpsizliki muhakime yighini” 16-féwral myunxén shehiride bashlan'ghan bolup, 3 kün dawamlishidighan bu yighin'gha yüzdin artuq dölettin 500 din artuq dölet rehberliri kélip qatnashmaqta idi. Türkiyedin bash ministir binali yildirim, tashqi ishlar ministiri chawush oghlu we ichki ishlar ministiri süleyman soylu qatarliq dölet erbabliri ishtirak qilghan.
Uzun yillardin buyan xitayning bésimi bilen türkiyege kirishi men'i qilinip kelgen duqning re'isi dolqun eysa ependining 16-féwral myunxénda türkiye dölet rehberliri bilen ayrim-ayrim söhbetlerde bölishi, közetküchilerning diqqitini qozghidi.

Türkiye dölet rehberliri bilen bolghan bu uchrishish heqqide bügün ziyaritimizni qobul qilghan dolqun eysa ependi, türkiye bash ministiri binali yildirim ependi bilen körüshkende uninggha Uyghur élining nöwettiki weziyitini anglatqanliqini we bu weziyet toghrisida hazirlan'ghan tepsiliy bir doklatni teqdim qilghanliqini bildürdi. 

Duqning mu'awin re'isi perhat muhemmidi ependi bu uchrishishqa baha bérip, qurultay re'isi dolqun eysa ependining bu nöwet türkiye dölet rehberliri bilen körüshüshining muhim siyasiy ehmiyetke we xitaygha nisbeten jiddiy signal bérish xaraktérige ige bir körüshüsh hésablinidighanliqini tekitlidi.
Dolqun eysa ependi türkiye bash ministiri binali yildirim bilen bolghan uchrishishtin kéyin, teklip boyiche türkiye ichki ishlar ministiri süleyman soylu ependi bilen körüshüp söhbetleshken. Ichki ishlar ministiri süleyman soylu bilen bolghan söhbette dolqun eysa ependi nuqtiliq halda malayshiyadin xitaygha qayturulush aldida turghan 11 neper Uyghurning qiyin weziyitini bildürgen we türkiye hökümitidin jiddiy yardem telep qilidighanliqini tilgha alghan. 

16-Féwral küni kechte yene dolqun eysa ependini bash ministir binali yildirim we ichki ishlar ministiri süleyman soylularning yardemchiliri ayrim qobul qilip, Uyghur élining nöwettiki weziyiti, muhajirettiki Uyghurlarning türkiye dölitige bolghan ümid-istekliri, duqning telepliri heqqide tepsiliy melumat igiligen. 

Duq xitay ishliri komitétining mudiri, amérika Uyghur birleshmisining re'isi ilshat hesen ependimu duqning re'isi bilen türkiye dölet rehberliri arisida ötküzülgen bu uchrishishlargha yuqiri baha berdi.