Dunya Uyghur qurultiyi re'isi dolqun eysa yaponiyede ziyarette boldi

D u q re'isi dolqun eysa ependi yaponiye ziyariti jeryanida yaponiye parlaménti yuqiri palata ezasi eriko yamatani xanim bilen körüshti. 2017-Yili 27-noyabir, yaponiye.

D u q re'isi dolqun eysa ependi yaponiye ziyariti jeryanida yaponiye parlamént ezasi, Uyghur dostluq guruppisi re'isi füruya kéiji ependi bilen körüshti. 2017-Yili 27-noyabir, yaponiye.

Dunya Uyghur qurultiyi 6-nöwetlik pewqul'adde qurultiyidin kéyinla, d u q re'isi dolqun eysa ependi 24-noyabir künidin 28-noyabir künigiche yaponiyede ziyarette boldi. Yaponiye qurultiyi qurulghanliqining 20 yilliqini tebriklesh murasimigha qatnishish üchün teklipke bina'en yaponiyege barghan dolqun eysa ependi, yaponiye parlamént ezasi takashi naga'o, parlamént ezasi, Uyghur dostluq guruppisi re'isi füruya kéiji ependi, yaponiye parlaménti yuqiri palata ezasi eriko yamatani xanimlar bilen uchriship Uyghurlarning hazirqi weziyiti, Uyghur dawasining hazirqi weziyiti toghrisida melumat bergendin sirt, bundin kéyinki hemkarliq toghrisida pikir almashturdi. Biz bu ziyaret toghrisida melumat igilesh üchün d u q re'isi dolqun eysa bilen téléfon söhbiti élip barduq.

Dolqun eysa ependi dunya Uyghur qurultiyining re'isi bolup saylan'ghandin kéyinki tunji ziyaritini yaponiyege élip barghanliqini bayan qildi.

Dunya Uyghur qurultiyi re'isi dolqun eysa ependi bu qétim yaponiyening eng chong ammiwi teshkilatliridin biri bolghan yaponiye qurultiyining qurulghanliqining 20-yilliqi munasiwiti bilen ötküzülgen murasimgha qatnishish üchün barghanliqini, 27-noyabir küni tokyoda mezkur murasimgha ishtirak qilghanliqini bayan qildi. Dolqun eysa ependi bu qétimqi yaponiye ziyariti jeryanida parlamént ezasi, Uyghur dostluq guruppisi re'isi füruya kéiji ependi bashchiliqidiki köp sanda siyasetchiler bilen uchriship bundin kéyin qandaq hemkarliq élip bérish toghrisida muzakire élip barghanliqini bayan qildi. 

Dolqun eysa ependi 24-noyabir künidin 28-noyabir künigiche yaponiyege élip barghan qisqa ziyariti jeryanida yaponiyediki sakura téléwiziyisige oxshash axbarat organlirining ziyaritini qobul qilip, Uyghurlarning hazirqi weziyiti toghrisida melumat bergenlikini bayan qildi. 

Dunya Uyghur qurultiyi wekili ilham mexmut ependi dolqun eysa ependining bu qétimqi ziyaritining waqti qisqa bolghan bolsimu nahayiti ünümlük ötkenlikini bayan qildi. 

Ilham mexmut ependi yaponiye parlaméntidiki Uyghur dostluq guruppisi bilen bundin kéyin qandaq hemkarlishish toghrisida muhim muzakirilerning élip bérilghanliqini bayan qildi.

Bu yil qurulghanliqigha 20 yil bolghan yaponiye qurultiyi bu 20 yil jeryanida yaponiyening milliy menpe'eti, dölet mudapi'esi we yaponiyening milliy bixeterlikini, yaponiye xelqige chüshendürüsh, yaponiye menpe'etini qoghdashni meqset qilghan, yaponiyening herqaysi jaylirida shöbiliri bar ammiwi siyasiy teshkilatlardin biri bolup, kéyinki 10 yildin béri yaponiyening asasiy qanunigha tüzitish kirgüzüsh xizmiti élip bérish bilen birlikte Uyghurlarghimu köp yardem qilghan. Ilham mexmut ependi bu heqte qisqiche melumat berdi.