Дуня уйғур қурултийи рәһбәрлири ақсарайдики юқири дәриҗилик әмәлдарлар билән көрүшти

Дуня уйғур қурултийиниң рәиси долқун әйса билән иҗраийә һәйити рәиси өмәр қанат 10-сентәбир күни америкиниң юқири дәриҗилик әмәлдарлири билән ақсарайда көрүшүп , уйғурлар һазир дучар болуватқан җиддий мәсилиләр үстидә сөһбәт елип барған.

Улар ақсарай әмәлдарлири билән көрүшүш җәрянида бир милйон уйғурниң җаза лагерлирида тутуп турулуши, америка вә ғәрб әллириниң хитайға буни җиддий мәсилә үстидә бесим қилиши һәм уйғурларға қарши бу хил қаттиқ қол бастуруш елип бериватқан хитай әмәлдарлирини җазалаш қатарлиқ бир йүрүш мәсилиләр үстидә сөһбәт елип барған. Долқун әйса билән өмәр қанат бу әмәлдарлар билән көрүшүш җәрянида өзлириниң америка һөкүмити вә дөләт мәҗлисигә болған миннәтдарлиқини билдүрүпла қалмай, йәнә өзлириниң уйғур мәсилисини бир тәрәп қилиш тоғрисидики пикир-тәклиплирини оттуриға қойған.

Дуня уйғур қурултийи рәиси долқун әйса ақсарайдики бу сөһбәткә қатнишиш үчүн өзиниң явропа парламентидики бәзи паалийәтлирини тохтитип, 10-сентәбир күни вашингтонға йетип келип, ақсарайдики юқири дәриҗилик әмәлдарлар билән сөһбитини ғәлибилик аяғлаштуруп шу күни ахшими йәнә белгийәгә сәпәр қилди.

Юқиридики аваз улиниши арқилиқ, уйғур бөлүминиң директори алим сейтофниң д у қ рәиси долқун әйса вә иҗраийә һәйити рәиси өмәр қанат билән елип барған сөһбитини аңлиғайсиләр.