Rabiye qadir xanim 5 - qurultayning ehmiyiti we parizhda échishning sewebi heqqide toxtaldi

Dunya Uyghur qurultiyining muhim rehberliri 28 - féwraldin 1 - martqa qeder washin'gtonda uchriship, 5 - nöwetlik qurultayni parizhda échishni qarar qilghandin kéyin, muxbirimiz bügün qurultay re'isi rabiye qadir xanimni ziyaret qilip, bu qétimqi yighin we parizhda échilghusi qurultay heqqide melumat soridi. Rabiye xanim 5 - nöwetlik qurultayning ehmiyiti we parizhda échilishining sewebliri üstide nuqtiliq toxtaldi.

So'al: aldi bilen 5 - nöwetlik qurultayning parizhda échilishining sewebi heqqide bir izahat bersingiz.

Jawab: parizh inqilab, erkinlik we démokratiye jehettin dunyada ülgilik, simwolluq sheherlerdin biri. Biz Uyghur xelqining öz teqdirini özi belgilesh hoquqi üchün küresh qiliwatqan bir teshkilat bolush süpitimiz bilen, bu qétimqi yighinni mana mushundaq bir sheherde échishni uyghun körduq. Ikkinchidin, yawropadiki barliq teshkilatlirimizgha musape jehettin qolay bolushini közde tuttuq. Üchinchidin, muhajirettiki qérindashlirimizgha ayan bolghandek, qurultay ijra'iye komitéti ezaliri 5 - nöwetlik qurultayni bérlinda yaki washin'gtonda échish mesiliside pikir ixtilapigha chüshti we bu heqte keskin talash - tartishlar yüz berdi. Shunga bu ixtilapni hel qilishta ottura yolni tallash üchün parizhni muwapiq körduq.

So'al: bilishimizche, qurultay rehberlirining bu qétim washin'gtonda uchrishishi bir'az ushtumtut boldi, démek bu uchrishishni asasliqi ene shu siz dégen ixtilapni hel qilish üchün dések toghra bolamdu?

Jawab: shundaq, toghra bolidu.

So'al: bu uchrishish we muzakire qandaq ötti?

Jawab: qurultiyimizning ichidila emes, muhajirettiki barliq Uyghur teshkilat we pa'aliyetchiliri arisida sözleshsekla kélishelmeydighan mesile yoq. Chünki hemmimizning meqsiti wetinimizni azad qilish, sherqi türkistan xelqige hörlük élip kélish, düshminimiz ortaq. Shunga muzakirimiz öz - ara chüshinish, yol qoyush, hörmet qilish asasida intayin muweppeqiyetlik ötti. Hemme mesilide pikir birlikige kelduq.

So'al: ijtima'iy taratqulardiki keskin talash - tartishlarning tesiri muzakirenglarda sayisini körsettimu?

Jawab: barliq teshkilatchilirimizning ortaq alahidilikliridin biri pidakarliq. Chünki biz méngiwatqan yolda shu yolda mangghuchigha bir menpe'et yoq. Peqet japa - musheqqet we bedel tölesh bar. Xelqimizning ümidini aqlap, wijdanimizgha jawab bérish we allaning dergahigha yüzimiz yoruq bérish, biz bu yoldikilerning küch we énérgiye menbesi. Shunga biz ötken talash - tartishlarning héchbirini tekrarlimasliq, peqetla aldimizgha qarash we bundin kéyin néme qilish heqqide sözlishish sherti bilen muzakire élip barduq. Shunga muzakirimiz köngüllük we netijilik axirlashti. Mezkur ixtilapqa chüshkenler arisida utturghan terep bilen bolmidi, hemmimiz uttuq.

So'al: échilghusi 5 - nöwetlik qurultayning ehmiyiti heqqide qisqiche melumat bersingiz?

Jawab: qurultiyimiz nizamnamisi boyiche qurultay 4 yilda bir qétim échilidu, ötken xizmetlerni xulasileydu we kéyinki 4 yilliq pilan tüzülidu, bu nuqtidin normal qurultay. Emma bu qétim yuqirida déyilgen ixtilap sewebidin, qurultay rehberlik qatlimi yéqinqi 10 yil ichidiki zor bir imtihan'gha duch keldi we bu imtihandin ötti. Bir teshkilat ichide oxshimighan, hetta öktichi pikirlerning bolushi bir ajizliq emes, bayliq. Gep, oxshimighan pikirlerni ghayidin chetnimigen, asasliq düshmenni untumighan, öz - ara parchilinishqa yol achmighan asasta hel qilish - qilalmasliq iqtidari shu teshkilatning sapasini körsitidu. Shunga deymenki, qurultiyimiz barghanséri küchliniwatidu, pa'aliyetchilirimiz piship yétiliwatidu. Bu piship yétilish, bu chéniqish buningdin kéyin qurultiyimizning sherqi türkistan musteqilliqidin ibaret bu mubarek ghaye üchün téximu chong we téximu emeliy qedemlerni bésishimizgha küch ata qilidu.