Әркин сидиқ: “уйғур билим игилири милләтниң тәқдиригиму көңүл бөлүши керәк!”

14-Май күни америка аләм қатниши идарисиниң оптика инженери, доктор әркин сидиқ өзи ишләватқан тәтқиқат гурупписи тәрипидин мукапатланған. Мәзкур риғбәтләндүрүш мукапати униң “аләм бошлуқида йеңи пиланетиларни көзитидиған телескоп тәтқиқати” дики алаһидә нәтиҗилиригә берилгән. Бу мунасивәт билән доктор әркин сидиқ әпәнди радийомиз зияритини қобул қилип, өзиниң әң йеқинқи тәтқиқат нәтиҗилирини тонуштурди вә бүгүнки қийин вәзийәттә уйғур билим адәмлириниң кәспий җәһәттики мувәппәқийәтлири билән бир вақитта йәнә вәтән-милләтниң тәқдиригә чоқум көңүл бөлүши лазимлиқини тәкитлиди.

Әркин сидиқ әпәнди уйғурларниң бешиға еғир күнләр келиватқан бүгүнки вәзийәттә чәтәлләрдә яшаватқан уйғур зиялийлириниң, болупму юқири қатлам билим игилириниң кәспий җәһәттики тиришчанлиқ билән бир вақитта йәнә уйғур миллити дуч келиватқан киризсларни қандақ һәл қилиш, яш әвладларға қандақ илһам бериш, милләтниң кәлгүси үчүн үмид чириғини һәргизму өчүрүп қоймаслиқ қатарлиқ мәсилиләр бойичә өз қарашлирини оттуриға қойди.

У йәнә муһаҗирәттики уйғур яшлирини өзлири яшаватқан дөләтләрдики әвзәл шараитлардин үнүмлүк пайдилинип тиришип оқуши лазимлиқини, шуниң билән бир вақитта йәнә уларниң уйғурлуқ миллий кимликини унтуп қалмаслиқини, уйғурлар тарихтики әң қийин бир мәзгилдә туруватқан бүгүнки күндә яшларниң өз миллити үчүн қурби йәткән һәрқандақ бир тиришчанлиқни көрситиштин чекинмәсликини тәвсийә қилди.