Firansiye Uyghur jem'iyiti özining rehberlik apparatini yéngidin saylidi

Ixtiyariy muxbirimiz erkin tarim
2019-01-22
Share

20-Yanwar küni merkizi firansiyening parizh shehiridiki firansiye Uyghur jem'iyitining 4-nöwetlik saylimi ötküzüldi. Saylamgha teshkilat rehberliri, mezkur teshkilatqa eza bolghan parizh shehiride we bashqa sheherlerde yashawatqan bir bölük Uyghurlardin bolup 80 etrapida kishi qatnashqan.

Melum bolushiche, firansiye Uyghur jem'iyiti 2008-yili parizhda qurulghan bolup, bu teshkilat eyni waqitta firansiyede pa'aliyet élip bériwatqan tibet we xitay démokratlirining teshkilatliri hem xelq'ara kechürüm teshkilatliri bilen birlikte xitaygha qarshi naraziliq namayishlirigha ishtirak qilghan. Saylam qa'idisige bina'en bu qétim 4-nöwetlik saylimini élip bérilghan. 

Saylamdin ilgiri teshkilatning kona rehberlik hey'iti sehnidin orun élip, aldi bilen ötken 4 yilliq xizmetliri toghrisida doklat bergen, xizmet doklatidin kéyin maliye doklati bérilgen. 

Saylamgha Uyghur pa'aliyetchi merdan bari ependi riyasetchilik qilghan. Saylamda démokratik prinsiplargha asasen bélet tashlap awaz bérish usuli arqiliq teshkilat re'isi saylap chiqilghan bolup, firansiye Uyghur jem'iyitining sabiq mu'awin re'isi alim ömer ependi mezkur teshkilatning re'islikige saylan'ghan. 

Re'islik saylimidin kéyin teshkilatning 3 neper mu'awin re'isi, katipi, maliye mudiri, ijra'iye hey'et ezaliri we teptishi saylap chiqilghan. Firansiye Uyghur jem'iyitining sabiq re'isi ekber yüsüp ependi neq meydandin téléfon ziyaritimizni qobul qilghanda bu qétimqi saylamning netijilik bolghanliqini mu'eyyenleshtürdi. 

Firansiye Uyghur jem'iyitining yéngi re'isi alim ömer ependimu ziyaritimizni qobul qilip, bu qétimqi saylamda özining re'islikke saylan'ghanliqini, Uyghurlarning hazirqi weziyitining intayin éghir ikenlikini, bundin kéyinki pa'aliyetliride nuqtiliq halda firansiye parlaménti we hökümitige tesir körsitishke tirishidighanliqini ipade qildi. 

Alim ömer ependi firansiyening yawropadiki muhim döletlerdin biri ikenlikini, özlirining firansiyeni merkez qilghan halda yawropa döletliride Uyghurlarning erkinliki üchün pa'aliyet élip baridighanliqini bayan qildi. 

Uyghurlar firansiyege 2000-yillarning bashliridin tartip kélishke bashlighan bolup, hazir firansiye boyiche 500 etrapida Uyghur bar iken. Ekber yüsüp ependi bu heqte melumat berdi. 

Saylamda bélet tashlighan rizwan'gül xanim, saylamning démokratiyelik usulda ötküzülgenlikini bayan qildi. 

Firansiye Uyghur jem'iyitige re'is bolup saylan'ghan alim ömer ependi ürümchide tughulup chong bolghan bolup, bashlan'ghuch, ottura we toluq ottura mektepni ürümchide püttürgendin kéyin 2004-yili firansiyege kelgen. Ilgiri u firansiye Uyghur jem'iyitining mu'awin re'islik wezipisini ötigen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet