Мюнхендики һуҗумда он нәччә киши д у қ ишханисида панаһланди

Хәлқара таратқуларниң хәвиридин мәлум болушичә, 22 - июл кәчқурун германийәниң мюнхен шәһиридики олимпик сода мәркизи қатарлиқ бирқанчә җайда қораллиқ һуҗум вәқәси йүз бәргән. Сақчилар вәқәдә нәччә он адәмниң өлгәнликини вә сода райониниң қамал қилинғанлиқини елан қилип, кишиләрни вәқә бесиққучә сиртқа чиқмаслиққа, панаһлинишқа агаһландурған. Дуня уйғур қурултийи баш катипи долқун әйсаниң билдүрүшичә, сода мәркизигә йеқин җайдики дуня уйғур қурултийи ишханисиғиму 20 - 30 ға йеқин яш кирип панаһланған.

Юқириқи учурлар оттуриға чиққандин кейин, дуня уйғур қурултийи баш катипи долқун әйсаға телефон қилип әһвал игилидуқ.

Дуня уйғур қурултийи баш катипи долқун әйса әпәнди 22 - июл чүштин кейин саәт 7 дин ашқанда өзиниң ишхана сиртида оқ етилған авазларни аңлиғанлиқини, арқидин ишханиниң төвән қәвитидики ишикниң ечилип 20 - дин 30 қәдәр болған яшларниң ишханиға панаһлиниш үчүн кирип кәлгәнликини вә өзи билән сөзләшкән яшларниң сода мәркизидә нәччә он адәмниң етип өлтүрүлгәнликини ейтқанлиқини билдүрди.

Дуня уйғур қурултийиниң мюнхендики ишханисиға панаһланған бир герман яш сода мәркизидә оқ атқан адәмни өз көзи билән көрмигәнлики, оқ авазиниму аңлимиғанлиқи әмма башқиларниң тәрәп - тәрәпкә қечишқа башлиғанлиқини көргәндин кейин өзиниңму қечип бу ишханиға киривалғанлиқини билдүрди. У йәнә бу вәқәниң немә сәвәбтин йүз бәргәнликидин хәвәр йоқлиғини ейтти.

Германийәниң мюнхен шәһиридики радийомиз ихтияри мухбири әкрәм әпәнди германийә телевизорлирида вәқә һәққидә бериливатқан хәвәрләрдин нәқил елип, вәқәниң 22 - июл шу йәр вақти кәч саәт 7 әтрапида йүз бәргәнликини, сақчиларниң вәқә садир қилғучиларниң қораллиқ 3 киши икәнликини билдүрүп, кишиләрни сақчилар қатилларни тутқичә кочиға чиқмаслиққа агаһландурғанлиқи қатарлиқ әһвалларни билдүрди.

Радийомиз зияритини қобул қилған долқун әйса әпәнди йәнә өзлириниң әһвали һәққидә телефон арқилиқ сақчиларға хәвәр бәргәндин кейин, сақчиларниң уларға вәқә бесиққучә ишханидин чиқмаслиқ, ишхана чирағлирини өчүрүп өзлирини мудапиә қилишқа агаһландурғанлиқини билдүрди.

Долқун әйса әпәнди мундақ деди: “һазирчә биз үчүн бир чоң чатақ йоқ. Сақчилар билән сөзләштуқ, улар бизниң ишхана бар кочини контрол астиға апту, бизгә чирағларни өчүрүп, ишханида җим олтурушни тәвсийә қилди. Иншааллаһ бир чатақ болмас.”

Долқун әйса әпәнди баянида йәнә, дуня уйғур қурултийи ишханисиға йеқин җайдики тәклимакан уйғур рестораниғиму бир қисим кишиләр панаһлиниш үчүн киргәнликини аңлиғанлиқини билдүрүп, ишханиниң сирт билән болған алақиси үзүлгәнлики вә телевизорни ечиш имканийити болмиғачқа вәқәниң немә сәвәбтин йүз бәргәнлики вә ким тәрипидин елип бериливатқанлиқини шундақла мюнхендики башқа уйғурларниң әһвалини билмәйдиғанлиқини ейтти.

Әкрәм әпәнди қораллиқ һуҗум вәқәси йүз бәргән җайлар һәққидә тохтилип, вәқәниң мюнхен шәһиридики олимпия сода мәркизи вә калзплатз стаһус йәни мәрйәм сода мәйданида йүз бәргәнликини, мюнхендики дуня уйғур қурултийи ишханиси билән тәклимакан уйғур рестораниниң вәқә йүз бәргән шәһәр мәркизидики карлзплатз стаһус дегән йәргә 100 метир, мәрйәм сода мәйданиға 200 метир арилиқта икәнлики, мушу сәвәбтин, қораллиқ кишиләрниң һуҗумидин қачқанларниң қурултай ишханиси вә тәклимакан уйғур рестораниға кирип панаһланғанлиқини билдүрди.

Әкрәм әпәнди мюнхен шәһәр вәзийити һәққидә өзи игилигән әһваллар һәққидә тохтилип, һазирчә мюнхендики уйғурларниң арисида вәқәдә яриланғанларниң йоқлуқини билдүрди.

Нөвәттики әң йеңи мәлуматларға қариғанда, нөвәттә вәқәдә өлгән адәм сани 9 нәпәргә йәткән. Йәрлик сақчи даирилири вәқә гумандарлирини техи издәватқанлиқини билдүргән.