Голландийәдики уйғурлар халисанә елим - сетим йәрмәнкиси өткүзди

Ихтиярий мухбиримиз пидаий
2016-10-09
Елхәт
Пикир
Share
Принт
явропа шәрқий түркистан маарип җәмийити орунлаштуған 2-қетимлиқ «кәрмис» паалийити йәни «халисанә елим-сетим йәрмәнкиси» паалийитидә тамақ етиватқан устилар. 2016-Йили 8-өктәбир, голландийә.
Явропа шәрқий түркистан маарип җәмийити орунлаштуған 2-қетимлиқ «кәрмис» паалийити йәни «халисанә елим-сетим йәрмәнкиси» паалийитидә тамақ етиватқан устилар. 2016-Йили 8-өктәбир, голландийә.
RFA/Pida’iy

8-Өктәбир голландийәдики явропа шәрқий түркистан маарип җәмийити 2-қетимлиқ «кәрмис» паалийити йәни (халисанә елим-сетим йәрмәнкиси) паалийитини башланди. Икки күн давам қилған бу паалийәткә голландийәдә яшаватқан уйғурлар аилә әзалири билән келип иштирак қилди. Бу, мәзкур җәмийәтниң бу йил ичидә елип барған иккинчи қетимлиқ «кәрмис» паалийити йәни (халисанә елим-сетим йәрмәнкиси) болуп, май айлирида бир қетим тәшкиллигән вә бәлгилик үнүм қазанған иди.

Паалийәт мәзкур җәмийәтниң әзалири вә қоллиғучилириниң ортақ күч чиқириш нәтиҗисидә, бир қанчә күнлүк җиддий тәйярлиқтин кейин, 8-өктәбир шәнбә күни башланди.

Бу қетимлиқ паалийәттә йемәк-ичмәк, китаб, доппа-көйнәк вә совғат буюмлиридин башқа, кичик балилар үчүнму алаһидә тақлаш оюнчуқи қошулған болуп, ата-анилириға әгишип кәлгән балилар үчүн хушаллинарлиқ бир иш болди.

Паалийәттә сетилған таамларни мәзкур җәмийәтни қоллиғучи әпәнди-ханимлар өзлири тәйярлиған болуп, полу, кавап, самса, ләңмән, печинә-пирәник қатарлиқ йемәк-ичмәкләр тәми вә мувапиқ баһаси билән херидарларниң махтишиға еришти. Униңдин башқа, канва көңләк, һәрхил доппа, ханим-қизларниң шарпа, яғлиқ, лечәклири, аччиқ-чүчүк, татлиқ түрүмләр қатарида, уйғурчә китабларму еһтияҗ саһиблирини хушал қилди.

Зияритимизни қобул қилған голландийәлик бир киши, өзиниң бир уйғур ханимға өйләнгәнлики, бу йәргә уйғурларниң мәдәнийәт паалийәтлирини көрүш вә уларни қоллаш йүзисидин кәлгәнликини билдүрди.

Йәнә бир түрк яшму, уйғур бурадәрлириниң паалийәтлири қоллаш вә уйғур йемәклиридин еғиз тегиш мәқситидә кәлгәнликини билдүрди.

Паалийәт тәшкиллигүчиләрниң вәкили вә йирақ-йеқиндин қоллап паалийәткә күч қошқанларму бу қетимлиқ паалийәткә көрсәткән ихласи вә иҗтиһатлирини баян қилди.

Уйғурлар арисидиму зияритимизни қобул қилғанлар бүгүнки бу паалийәттин алған мәнпәәтлири вә һессиятлирини радио аңлиғучилиримиз билән ортақлашти.

Пикирләр (0)
Share
Толуқ бәт