Gollandiyediki Uyghurlar xalisane élim - sétim yermenkisi ötküzdi

Yawropa sherqiy türkistan ma'arip jem'iyiti orunlashtughan 2-qétimliq “Kermis” pa'aliyiti yeni “Xalisane élim-sétim yermenkisi” pa'aliyitidin körünüsh. 2016-Yili 8-öktebir, gollandiye.

8-Öktebir gollandiyediki yawropa sherqiy türkistan ma'arip jem'iyiti 2-qétimliq “Kermis” pa'aliyiti yeni (xalisane élim-sétim yermenkisi) pa'aliyitini bashlandi. Ikki kün dawam qilghan bu pa'aliyetke gollandiyede yashawatqan Uyghurlar a'ile ezaliri bilen kélip ishtirak qildi. Bu, mezkur jem'iyetning bu yil ichide élip barghan ikkinchi qétimliq “Kermis” pa'aliyiti yeni (xalisane élim-sétim yermenkisi) bolup, may aylirida bir qétim teshkilligen we belgilik ünüm qazan'ghan idi.

Pa'aliyet mezkur jem'iyetning ezaliri we qollighuchilirining ortaq küch chiqirish netijiside, bir qanche künlük jiddiy teyyarliqtin kéyin, 8-öktebir shenbe küni bashlandi.

Bu qétimliq pa'aliyette yémek-ichmek, kitab, doppa-köynek we sowghat buyumliridin bashqa, kichik balilar üchünmu alahide taqlash oyunchuqi qoshulghan bolup, ata-anilirigha egiship kelgen balilar üchün xushallinarliq bir ish boldi.

Pa'aliyette sétilghan ta'amlarni mezkur jem'iyetni qollighuchi ependi-xanimlar özliri teyyarlighan bolup, polu, kawap, samsa, lengmen, péchine-pirenik qatarliq yémek-ichmekler temi we muwapiq bahasi bilen xéridarlarning maxtishigha érishti. Uningdin bashqa, kanwa könglek, herxil doppa, xanim-qizlarning sharpa, yaghliq, léchekliri, achchiq-chüchük, tatliq türümler qatarida, Uyghurche kitablarmu éhtiyaj sahiblirini xushal qildi.

Ziyaritimizni qobul qilghan gollandiyelik bir kishi, özining bir Uyghur xanimgha öylen'genliki, bu yerge Uyghurlarning medeniyet pa'aliyetlirini körüsh we ularni qollash yüzisidin kelgenlikini bildürdi.

Yene bir türk yashmu, Uyghur buraderlirining pa'aliyetliri qollash we Uyghur yémekliridin éghiz tégish meqsitide kelgenlikini bildürdi.

Pa'aliyet teshkilligüchilerning wekili we yiraq-yéqindin qollap pa'aliyetke küch qoshqanlarmu bu qétimliq pa'aliyetke körsetken ixlasi we ijtihatlirini bayan qildi.

Uyghurlar arisidimu ziyaritimizni qobul qilghanlar bügünki bu pa'aliyettin alghan menpe'etliri we héssiyatlirini radi'o anglighuchilirimiz bilen ortaqlashti.