“Ürümchi réstorani” gollandiyede teshwiq qilindi

Zeynidin ependi “5-Aprél barin weqesi”, “5-Féwral ghulja weqesi”, “5-Iyul ürümchi weqesi” we “28-Iyul yerken weqesi” ge atap bézigen gülchembirek. 2017-Yili 23-iyun, gollandiye.

Rottérdamdiki “Ürümchi réstorani” ta'amliri bilenla emes, Uyghurche süpetliri hem milliy pa'aliyetliri bilen gollandiyede teshwiqat témisi bolmaqta.

Gollandiyediki “Xelq géziti” torining “Ürümchi réstorani” heqqide ishligen filimining qisqa bir körünüshi 6-séntebir élan qilinipla, ijtima'iy taratqularda hesh-pesh dégüche 47 ming kishining ziyaritige ulashti. Filimda Uyghur doppisi, Uyghur ta'amliri tonushturulghan idi. Bu filim muhajirettiki Uyghur jama'itining qizghin alqishlirigha sazawer boldi.

“Ürümchi réstorani” ikki yil ilgiri gollandiyening rottérdam shehiride Uyghur ziyaliysi zeynidin tursun ependi teripidin échilghan bolup, bu réstoran Uyghur etlesliri, chimen doppa, badam doppa we Uyghur chalghu örnekliri bilen bézelgen. Bu sheherde aran 15 etrapida Uyghur ahale yashaydiken. Pütün gollandiyediki Uyghurlarning sani texminen 2 ming etrapida iken. Gollandiyede “Gollandiye sherqiy türkistan Uyghur birliki”, “Yawropa sherqiy türkistan ma'arip jem'iyiti” qatarliq teshkilatlar pa'aliyet élip baridiken.

Téxi aldinqi aydila, zeynidin ependining gollandiyediki xelq'ara kechürüm teshkilatining bir qisim xadimlirini “Ürümchi réstoranida” da kütüwélip, bu yil 10-ayning 23-küni élip baridighan Uyghurlargha munasiwetlik bir muhim yighilishning hazirliqini qilishqanliqliri torlarda keng tarqalghan idi. Bügün bolsa, uning gollandiyede milyonlarche mushtirisi bolghan meshhur gézitliridin “Xelq géziti” ning teshwiqat nishanigha aylan'ghanliqi körüldi.Bu munasiwet bilen ziyaritimizni qobul qilghan zeynidin ependi özining qisqiche kechmishliri, “Ürümchi réstorani” ning weziyiti, her yili dawamlashturup kéliwatqan tarixiy weqelerni eslesh pa'aliyetliri we özining réstoran xizmitidin sirt, xelq'ara kechürüm teshkilati bilen birliship qiliwatqan ishliridin bizni waqiplandurdi.

Uyghur jama'itining diqqitini tartqini “Ürümchi réstorani” din bekrek, réstoran xojayini zeynidin ependining siyasiy pa'aliyetliri boldi. Bu yil 23-iyun küni, zeynidin tursun ependining Uyghur bügünki zaman tarixida yüz bergen axirqi 4 chong siyasiy weqeni xatirilesh üchün élip barghan özgiche pa'aliyetliri ijtima'iy taratqularda oxshashla qizghin qollash we maxtashlargha sazawer bolghan idi.

Shu chaghda u: “5-Iyul ürümchi weqesi” hemde “28-Iyul yeken weqesi” din ibaret xelq'arada zor tesir peyda qilghan 4 chong weqe üchün qanche ming dane qizil etirgül sétiwélip, rottérdamdiki xelq meydanida bu töt weqening yil xatirisini yürek sheklidiki chembirek ichige élip ajayip güzel bir menzire hazirlighan we bu arqiliq gollandiye xelqi, dunya jama'itining semige Uyghur tarixidiki qanliq qirghinchiliqlar bilen tolghan bu kechmishni salmaqchi bolghan idi. Uyghur jama'iti, ijtima'iy taratqularda uning Uyghurlar mesilisini tonutush üchün qollan'ghan bu özgiche usuligha eyni chaghda yuqiri bahalar bérishken hemde uning gheyretlirige apirinlar éytishqan idi.

Zeynidin tursun ependining ayali rahile xanimmu “Ürümchi réstorani” ning xizmitide érigha hemkarlishiwatqan bolup, u zeynidin ependining weten dewasi yolida élip bériwatqan pa'aliyetlirini yéqindin qollaydighanliqini bildürdi.

Zeynidin tursun ependi öz waqtida yene xelq'ara kechürüm teshkilatining ezasi bolghan bolup, u mezkur teshkilat bilen birliship Uyghur dewasini gollandiyede tonutushqa tériship kelgen. U bu yil 23-öktebir küni öz réstoranida xelq'ara kechürüm teshkilati bilen birlikte “Uyghur küni” pa'aliyiti ötküzüp, türmidiki öktichi Uyghur ziyaliysi ilham toxti mesilisini küntertipke ekélishke térishidiken.

Ayali rahile xanim bolsa, zeynidin ependining wetenning xizmiti yolida köpligen yaxshi arzuliri barliqini, özining chamining yétishiche yar-yölekte bolidighanliqini bayan qildi.