Enqerening qazan nahiyiside ötküzülgen “Ijtima'iy taratqu aktipliri uchrishishi” gha Uyghurlarmu qatnashti

Enqerening qazan nahiyiside ötküzülgen “Ijtima'iy taratqu aktipliri uchrishishi” gha qatnashquchilar. 2016-Yili 12-mart, türkiye.

Enqerening qazan nahiyiside ötküzülgen “Ijtima'iy taratqu aktipliri uchrishishi” gha qatnashquchilar. 2016-Yili 12-mart, türkiye.

Enqerening qazan nahiyelik hökümet teripidin uyushturulghan “Ijtima'iy taratqular aktipliri uchrishishi” gha Uyghurlarmu alahide teklip boyiche qatnashti.

Mezkur uchrishishqa qazan nahiyelik hökümet bashliqi loqman ertürk ependi bashchiliqidiki her derijilik rehberler, türkiye parlamént ezasi métin külünk ependi, türkiye ordu wilayitidin saylan'ghan parlamént ezasi métin gündoghdu ependi we türkiyening herqaysi jayliridin kelgen ijtima'iy taratqu aktipliridin bolup 250 etrapida kishi qatnashti. Uyghurlargha wakaliten türkiyede ijtima'iy taratqular arqiliq Uyghur mesilisini aktip anglitip kéliwatqan zhurnalist mirkamil qeshqerli ependi bilen 4 yash waqtida shé'ir déklamatsiye qilip dang chiqarghan müjahit qeshqerli qatnashti we shé'ir déklamatsiye qildi.

Uchrishish 3-ayning 12-küni qazan sheherlik hökümetning zalida ötküzülgen bolup, yighinning échilish nutqini qazan nahiyesining hakimi loqman ertürk ependi qilghan. U, nutqida ijtima'iy taratqularning nöwettiki ehmiyiti, uni ünümlük ishlitishning paydisi, naheqchilik, zulum we ishghaliyetke qarshi pa'aliyet élip bérishta ijtima'iy taratqularning orni qatarliq mesililer toghrida toxtilip mundaq dédi: “Hörmetlik parlamént ezaliri, qimmetlik méhmanlar men bügün oxshimaydighan bir héssiyat ichidemen. Bügün qazanda bayram ötküzüwatqandek hés qiliwatimen. Uzun yillardin béri didar körüshelmigen uruq-tughqanlar bir yerge kelgendek hés qiliwatimen. Biz ijtima'iy taratqularda uzundin béri alaqiliship turuwatqan, her xil xewer we melumatlarni ortaqlishiwatqan kishiler bu yerde jem bolduq. Bu biz üchün nahayiti zor ehmiyetlik bir ish. 21-Esir téxnologiye esiri. Biz téxnologiye arqiliq öz-ara xewerlishish, heqsizliklerni, adaletsizliklerni, zulumni dunyagha anglitishqa tirishiwatimiz. Biz sizler bilen birlikte ijtima'iy taratqulardin paydilinishta zor ghelibilerni qolgha keltürduq. Türk dunyasining muhim mesililiridin iraq türkmenliri mesilisi, sherqiy türkistan mesilisi, xoja'éli mesililirige oxshash mesililerni türkiyening kün tertipige élip kelduq.”

Bu uchrishishqa qatnashqan zhurnalist mirkamil qeshqerli ependi ziyaritimizni qobul qilip, bu pa'aliyetni uyushturushtiki meqsetning, qandaq qilghanda ijtima'iy taratqulardin ünümlük paydilinish ikenlikini bayan qildi.

Mirkamil qeshqerli ependi enqerening qazan nahiyisi bashliqi loqman ertürk ependining “Qazan nahiyiside xitayning Uyghurlargha élip bériwatqan zulumigha qarshi chiqayli” mawzuluq heriket qozghap, bu mesilini ijtima'iy taratqularda eng köp küntertipke élip kelgen kishi ikenlikini, bu qétimqi uchrishishtimu Uyghur mesilisining alahide kün tertipke kelgenlikini tekitlidi.

Zhurnalist mirkamil qeshqerli ependi chet'eldiki Uyghurlarning ijtima'iy taratqularda teshkillinip, öz dewasini dunyagha anglitishta ijtima'iy taratqulardin qandaq paydilinish toghrisida öz tejribilirini we bu qétimqi uchrishishta ögen'genlirini bayan qilip ötti. Uyghur ziyaliysi hamutxan köktürkmu ijtima'iy taratqularning roli heqqide toxtaldi.