Türkiye millet wekilliri parlaméntini ilham toxtigha ige chiqishqa chaqirdi

2014-Yili 1-ayning 24-küni türkiye parlaméntida milletchi heriket partiyisidin parlamént ezasi bolghan sinan ogan ependi söz qilip, türkiye hökümitini we parlamént tarmiqidiki kishilik hoquq komitétini Uyghurlargha köngül bölmigenlik bilen eyiblep tenqid qildi shundaqla türkiye kishilik hoquq komitétini ilham toxtigha ige chiqishqa chaqiriq qildi.

Parlamént ezasi sinan ogan parlaméntta söz qilip mundaq dédi: sherqiy türkistanda musulman türk bolushtin bashqa, héchqandaq jinayiti bolmighan insanlirimiz 70 yashliq anisi bilen tutulup türmige qamiliwatidu. Ilham toxti türmige qamaldi. Iskenjige uchridi, emma türkiye parlaménti kishilik hoquq komitéti bashliqi ayxan sefer üstinning bir tal qilimu tewrimidi. Ayxan sefer üstün bilen bes-munazire qilimen, ayxan sefer üstün türkiye parlaménti kishilik hoquq komitétining re'isi bolush süpiti bilen parlaméntta munberge chiqip bu heqte türk xelqige jawab bérishi kérek.

Oxshash künde yene, milletchi heriket partiyisidin parlamént ezasi newzat qorqmaz ependi parlaméntta söz qilip, Uyghurlarning hazirqi weziyiti toghrisida toxtaldi we 2013-yili Uyghur diyarida yüz bergen weqelerni bir-birlep tilgha aldi.

Newzat qorqmaz ependi türkiye hökümiti bash ministiri we tashqi ishlar ministirigha xitab qilip, ularni Uyghur diyaridiki qetli'amlargha süküt qilghanliq bilen eyiblidi we Uyghurlargha köngül bölüshke chaqiriq qildi.

Newzat qorqmaz ependi sözide yene, türkiye hökümitining dunya Uyghur qurultiyining re'isi rabiye qadir xanimgha wiza bermigenliki we türkiyege kirishini chekligenliki bilen eyiblidi hemde bu qilmishlirini qisqa waqit ichide tüzitip rabiye qadirning türkiyege kirishige ruxset bérishini telep qildi.

Newzat qurqmaz sözide yene, ilham toxtining türmige qamalghanliqini, shundin buyan qeyerde ikenliki toghrisida héchqandaq uchur élinmighanliqini, qeyerde ikenlikini héchkim bilmeydighanliqini, Uyghurlarning heq-hoquqini qoghdash yolida türmige qamalghan ilham toxtining héchqandaq jinayiti yoqluqini, pütün diktator hakimiyetlerning usuli boyiche, uni qanun'gha xilapliq qildi dep gumanlinip qolgha alghanliqini bildürdi we mundaq dédi: közliri turup körmigen, qulaqliri turup anglimighan türkiyedin bashqa pütün Uyghur dunyasi bu weqeni anglidi, kördi we ornidin des turdi.

Ötken hepte dunya Uyghur qurultiyining mu'awin re'isi séyit tümtürk bashchiliqidiki bir hey'et türkiye parlaméntini ziyaret qilip newzat qurqmaz ependi qatarliq bir türküm parlamént ezaliri bilen uchrashti we ulargha Uyghurlarning hazirqi weziyiti toghrisida doklat sunush bilen birge, ilham toxtining naheq tutup kétilgenlikini bildürgen idi.

Türkiye parlaméntining 548 parlamént ezasi bolup, buning ichide milletchi heriket partiyisining 52 parlamént ezasi bar, bu partiye muxalip, öktichi partiye süpitide xizmet qilmaqta.

Milletchi heriket partiyisi türk dunyasi birliki qurushni asasiy ghayisi dep qaraydighan partiye bolup, türk dunyasining mesililirige alahide köngül bölüshni xizmet prinsipi dep qaraydu we shu boyiche xizmet qilidu.

Türkiye parlaménti kishilik hoquq komitéti ötken yili 11-ayda Uyghurlargha köngül bölüsh we Uyghur diyarigha hey'et ewetip tekshürüsh élip bérish heqqide qarar alghan bolsimu, bu heqte hazirghiche axbaratlarda héchqandaq uchur bérilmidi.