Ilham toxti guruppisi anjila merkildin Uyghurlar mesilisini tilgha élishni telep qildi

Ilham toxti guruppisi gérmaniye bash ministiri anjila merkilge xet yézip, g20 yighinida Uyghurlar mesilisini tilgha élishni telep qildi.

Gérmaniye bash ministiri anjila merkil xanim xitayning sahipxanliqida yéqinda xangju shehiride chaqirilidighan 20 dölet guruhi yighinigha méngishtin ilgiri, ilham toxti guruppisining mes'uli enwerjan ependi teshkilati namidin alahide xet yézip, merkil xanimdin Uyghurlar mesilisini küntertipte tutushni telep qilghan.

Melumki, 31 - awghust küni Uyghur, tibet, mongghul we xitay démokratliri birleshme xet yézip, 20 dölet guruhi wekilliridin yighinida künséri nacharlishiwatqan xitaydiki kishilik hoquq mesilisini otturigha qoyushni telep qilghan idi.

Ilham toxti guruppisining mes'uli enwerjan ependi xétide, merkil xanimning ilgiri ilham toxti mesilisige köngül bölgenlikige rehmet éyitqan hemde nöwettiki Uyghur weziyitini uning semige salghan.

Uyghur siyasiy pa'aliyetchilirining qarishiche, yéqinqi yillardin buyan gérmaniye parlaménti kishilik hoquq komitétining Uyghurlar mesilisige köngül bölüsh derijiside nispeten ilgirilesh körülgen bolup, gerche xitayning Uyghurlargha bolghan bésim we zulumliri zor derijide éshiwatqan bolsimu, gérmaniye kishilik hoquq komitétining mes'ulliri her qétim merkil xanim bilen xitaygha barghanda yaki xitay bilen gérmaniye otturisida dawamlishiwatqan qanun di'alogida Uyghurlar mesilisini da'im otturigha qoyup kelgen. D u q mu'awin re'isi ümid agahi ependi bu heqte qisqiche melumat bérip ötti. Qurultay mu'awin re'isi perhat muhemmidi ependimu, bu heqte öz qarashlirini bildürüp ötti.

Enwerjanning bildürüshiche, ilham toxti guruppisi yene, aldimizdiki aylarda merkil xanimgha xet yézip, merkil ishxanisining jawabighimu érishken.

Ilham toxti guruppisi 2016 - yili 26 - april bérlinda resmiy qurulghanliqini jakarlighan kishilik hoquq teshkilati bolup, bu teshkilat may ayliri yawrupa parlaméntida ilham toxti heqqide mexsus yighin chaqirghan idi. Ilham toxti guruppisining mexsiti qamaqtiki ilham toxtini yawrupa birlikining kishilik hoquq jehettiki aliy mukapati bolghan saxarow mukapatigha érishtürüsh we ilham toxtining erkinliki yolida térishchanliq körsitishtin ibaret bolup kelmekte.