Xelqara insan heqliri küni munasiwiti bilen gérmaniyede namayish élip bérildi

10-Dékabir xelqara insan heqliri küni munasiwiti'i bilen gérmaniyening miyunxén shehiridiki xitay konsulxanisi aldida naraziliq namayishi élip bérildi.

Namayishni d u q ning teshebbusi bilen yawrupa sherqiy türkistan birliki teshkilati uyushturghan bolup, xitay konsulxanisi aldida ay-yultuzluq kökbayraq we herxil lozunkilarni kötürüshüp, türlük sho'arlarni towlashqan Uyghur jama'iti aldi bilen teshkilat re'isi esqerjanning xelqara insan heqliri küni toghrisidiki bayanlirini we Uyghurlarning nöwettiki weziyitige a'it melumatlarni anglidi.

Bu qétimqi namayishqa d u q rehberliri we yawrupa sherqiy türkistan birliki teshkilatining ezaliri hemde bir qisim türk kishilermu qatnashqan bolup, namayish chüshtin kéyin sa'et 14:30 da bashlandi. Yawrupa sherqiy türkistan birliki teshkilatining re'isi esqerjan ependi namayish jeryanida, alayiten bu namayish üchün yiraq-yéqinlardin kelgen Uyghurlargha köp rehmetlirini bildürüsh bilen birge, gérmaniyediki Uyghur jama'itini milliy dewagha téximu yéqin turushqa chaqirdi.

D u q mu'awin re'isi perhat muhemmidi ependi namayish meydanida ziyaritimizni qobul qilghanda, b d t ning insan heqliri bayannamisini Uyghurlar üchün bir yol xeritisi, dep atidi. U sözide yene, Uyghurlarning kélechiki heqqide toxtilip, b d t kishilik hoquq bayannamisigha köre, haman bir küni musteqil bir Uyghur döliti qurushning emelge ashidighanliqini tekitlidi.

Bu qétimqi namayishqa qatnashqan d u q bash katipi dolqun eysa ependimu ziyaritimizni qobul qilip, namayishning meqsidi we ehmiyetlirini tilgha aldi. Namayish jeryanida ilham toxti goruppisining re'isi enwerjan ependimu söz élip, Uyghurlarning insaniy heq-hoquqining eslide b d t kishilik hoquq bayannamisigha köre qoghdilishi we Uyghurlarning öz teqdirini özliri hel qilish heqqige ige ikenlikini eskertti. U sözide yene, 12-dékabir bawariye parlaméntida chaqirilidighan ilham toxti goruppisining yighini toghruluqmu toxtilip ötti.