Séyit nadir ependi we qizi i'ordaniyediki buxaraliqlar jem'iyitini türkistanliqlar jem'iyitige özgertish üchün herikette

Inqilabchi ata - bowilirining izida méngish üchün bel baghlighan iyordaniyediki Uyghurlardin karxanichi séyit nadir ependi bilen qizi, yéqinda ammanda ötküzülgen buxaraliqlar jem'iyitining re'is we hey'et saylimigha qatnashqan. Saylamda séyit nadir ependi jem'iyetning re'islikige, qizi bolsa jem'iyetning ayallar mudirliqigha saylan'ghan.

Saylamda utup chiqqan bu ata - bala pa'aliyetchiler türk milletliri ichide Uyghurlarning eng échinishliq ehwalda ikenliki we Uyghur mesilisining dunyagha tonulushining jiddiy zörürlükini ilgiri sürüp, özbékler asasi salmaqni igileydighan bu buxaraliqlar jem'iyitining namini türkistanliqlar jem'iyitige özgertish teklipini sun'ghan.

Bu teklip, mezkur jem'iyet ezaliri teripidin toghra körülgen, nöwette bu nam özgertishning qanuniy qedemliri bésilmaqta. Séyit nadir ependi, muxbirimiz bilen heqtiki söhbiti dawamida özlirining iyordaniyediki bashqa jama'etler bilen bolghan munasiwetliri heqqidimu toxtaldi.

Biz ötkenki programmimizda, séyit nadir ependi a'ilisining 1950 - yillardiki bay - zomigerlerge qarshi turush dolqunida en'gliye pasportining qutqazghuch rol oynighanliqini xewer qilghan iduq.

Séyit nadir ependi, bu qétimqi alaqimizde, ata - anisi 1956 - yili chégradin chiqishta qollan'ghan pasportning resimi bilen teminlidi. Resimdin melum bolushiche, séyit nadir ependining bowisi séyit ghulammemetxan 1930 - yillarda hindistanda alghan en'gliye pasporti, hindistan we pakistan musteqil bolghandin kéyin pakistan pasportigha özgertilgen. Séyit nadir ependining ata - anisi 1949 - - yili bérilgen pakistan pasportigha tayinip chégradin chiqqan. Mezkur pasport we wizining resimi tor bétimizde körülüshke hazirdur.