“Islam döliti” teshkilati ottura asiyagha xewp élip kélishi mumkinmu?

B b s agéntliqi qatarliq xelq'araliq taratqular we qirghizistandiki “Bishkek kechlik géziti” ge oxshash yerlik metbu'atlarning xewerlirige qarighanda, ottura sherqtiki “Iraq-sham islam döliti” teshkilatigha qoshulup, bu teshkilatning terkibide urushqa qatnishiwatqan ottura asiyaliqlarning sani barghanséri köpeymekte iken.

Qirghizistanning dölet xewpsizliki tarmaqliri qirghizistanning jenubi rayonliridin kétip bu teshkilatqa eza bolghanlarning sanining 400 neperge yéqin ikenlikini bildürdi.

Ottura asiyadiki dini közetküchiler “Islam döliti” teshkilatining yéqinda qazaqistan, qirghizistan, tajikistan hemde özbékistandin ottura sherqqe barghanlardin “Ottura asiya qoshuni”dégen bir top tüzgenliki, bu topning terkibide 4000 gha yéqin adem barliqini bildürdi.

Qirghizistandiki dini pa'aliyetchi qadir malikow 21-yanwarda ötküzülgen muxbirlarni kütüwélish yighinida bu heqte toxtilip, mundaq deydu: “Bizde hazir eng xeweplik rayon qirghizistanning jenubi oblastliri we perghane wadisi bolup qaldi. Nöwette ‛islam döliti‚ teshkilatining ottura asiya üchün nahayiti zor sommidiki xirajet bölgenliki heqqidiki melumatlar bar. Bularning deslepki pilani gerche özbékistan bolsimu, biraq qirghizistan we tajikistan memliketlirimu bu boran-chapqunning sirtida qalalmaydu. Shunglashqa hazir ottura asiyadiki barliq memliketler birliship bu xeterlik weziyetning aldini alidighan waqit yétip keldi, dep qaraymen”.

“Islam döliti” teshkilati rastinila ottura asiyagha xewp tughdurushi mumkinmu? eger bundaq xeterlik weziyet shekillense ottura asiya memliketliri qandaq aldini élish tedbirlirini qollinishi kérek?

Qazaqistandiki tonulghan siyasetshunas qehriman ghojamberdi bilen ötküzülgen téléfon söhbitide, u mezkur mesililer heqqide toxtaldi.

Awaz ulinishidin muxbirimizning qehriman ghojamberdi bilen bolghan söhbitini anglighaysiler.