Uyghur wekiller mekkide islam dunyasi ammiwi teshkilatlar birliki aliy kéngesh yighinigha qatnashmaqta

Muxbirimiz erkin tarim
2016-01-16
Share
islam-ammiwiy-teshkilatlar-birliki.jpg Islam dunyasi ammiwiy teshkilatlar birliki giribi
RFA/Erkin Tarim

Islam dunyasining nurghun jaylirida, muqimsizliq, ichki urushlar dawamlishiwatqan we insan heqliri depsendichiliki nahayiti éghir bir weziyette turuwatqan bügünki künde merkizi türkiyening istanbul shehiride turushluq islam dunyasi ammiwi teshkilatlar birliki se'udi erebistanning mekke shehiride islam dunyasi jem'iyetler birliki aliy kéngesh yighini chaqirdi. Mezkur yighin'gha dunyaning herqaysi jaylirida pa'aliyet élip bériwatqan musulmanlar qurghan ammiwi teshkilat mes'ulliri qatnishiwatqan bolup, Uyghur ammiwi teshkilatlirigha wakaliten merkizi istanbulda turushluq sherqiy türkistan ma'arip we hemkarliq jem'iyitining re'isi hidayetullah oghuzxan ependi qatnashmaqta.

Biz mekkige téléfon qilip uning bilen söhbet élip barduq.

Hidayetullah oghuzxan ependi 2007 - yilidila sherqiy türkistan ma'arip we hemkarliq teshkilatining islam dunyasi teshkilatlar birlikige eza bolghanliqini, hazirghiche bu teshkilatning pütün yighinlirigha qatniship kelgenlikini, bu yighinlar arqiliq Uyghur mesilisini islam dunyasigha nahayiti yaxshi anglattuq dep qaraydighanliqini bayan qildi.

U, bu yighinning ottura sherqning weziyiti intayin éghir boluwatqan, islam dunyasining nurghun jaylirida ichki urush dawamlishiwatqan bügünki künde bu mesililer toghrisida muzakire élip bérish meqsitide chaqirilghanliqini, özining mezkur yighinda Uyghurlar duchar boluwatqan siyasiy, iqtisadiy we diniy jehettiki bésimlarni anglitidighanliqini bayan qildi.

Islam dunyasi ammiwiy teshkilatlar birliki yighinidin bir körünüsh
Islam dunyasi ammiwiy teshkilatlar birliki yighinidin bir körünüsh

Hidayetullah oghuzxan ependi yene islam dunyasi jem'iyetler birlikining aliy kéngesh yighinining se'udi erebistanning mekke shehiride 3 kün dawamlishidighanliqini, yighinda ereb döletliri bilen xitay döliti otturisidiki munasiwetler toghrisidimu muzakiriler élip bérilidighanliqini, qisqiche qilip éytqanda yighinning Uyghur dewasi üchünmu paydiliq bolidighanliqini tekitlidi.

Bu qétimqisi 20 - qétimliq aliy kéngesh yighini bolup, burunqiliri herqaysi musulman döletliride chaqirilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.