Истанбулда “хитайниң террорлуққа қарши туруш қануни вә уйғурлар” дегән темида йиғин ечилди

Ихтиярий мухбиримиз арслан
2016.01.16
turkiye-istanbul-uyghur-xitay-terorluq-qanuni-yighin-sirajdin-hajim.jpg Сәуди әрәбистандин кәлгән тәтқиқатчи журналист сираҗидин әзизи әпәнди сөздә
RFA/Arslan


1 - Айниң 15 - күни мәркизи истанбулға җайлашқан шәрқий түркистан маарип вә һәмкарлиқ җәмийитиниң уюштуруши билән җәмийәт йиғин залида, “хитайниң террорлуққа қарши туруш қануни вә уйғурлар” дегән темида йиғин ечилди.

Йиғинға истанбулда яшаватқан уйғурлардин көп санда киши қатнашти. Йиғинға һаҗәтәпә университети оқутқучиси, истратегийә чүшәнчиләр институтиниң мутәхәссиси доктор әркин әкрәм тәклип билән қатнишип, “хитайниң террорлуққа қарши туруш қануни вә уйғурлар” дегән темида сөз қилди.

Доктор әркин әкрәм, хитайниң 2016 - йили 1 - айдин башлап иҗра қилишқа башлиған террорлуққа қарши туруш тоғрисидики қанун, бәлгилимилири тоғрисида мулаһизә йүргүзди вә бәзи уқумларниң бәк мурәккәп вә чүшиниксиз икәнликини әмәлий мисаллар билән оттуриға қойди, шундақла бу қанунларда террорлуққа қарши туруш асас қилинған болсиму, әмәлийәткә уйғун әмәсликини ипадилиди.

Доктор әркин әкрәм сөздә
Доктор әркин әкрәм сөздә

Доктор әркин әкрәм сөзидә йәнә, хитай билән уйғурларниң иқтисадий, сиясий, һәрбий саһәләрдә тәң келәлмәйдиғанлиқини, әмма әқилни ишлитип пикир - тәпәккур қилғанда әқли җәһәттин уларни йеңишкә болидиғанлиқини, шуниң үчүн әқилни көпләп ишлитип тәпәккур қилиш керәкликини, пикир - тәпәккур қилғанда, питнә териш, ғәйвәт қилиш, ялған сөзләш қатарлиқ нурғун начар илләтләрдин узақлишип, инсан өзидики кәмчиликләрни түзитишкә түрткә болидиғанлиқини, шундақ қилғанда аридики иттипақсизлиқниң алдини алғили болидиғанлиқини шуниң билән мувәппәқийәт қазиниш үчүн йол ечилидиғанлиқини оттуриға қойди.

Икки саәт давам қилған йиғинда йәнә, австралийәдин кәлгән диний алим абдусалам абдуғени әпәнди вә сәуди әрәбистандин кәлгән тәтқиқатчи журналист сираҗидин әзизи әпәндиләр пикир баян қилип, бу йиғилишниң әһмийити тоғрисида тохталди. Улар уйғур мусулманлири мәсилилирини һәл қилиш үчүн әқилни ишлитип пикир - тәпәккур қилғанда нурғун мәсилиләрни һәл қилалайдиғанлиқини, ислам дининиңму пикир - тәпәккур қилишқа әһмийәт беридиғанлиқини баян қилди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.