Истанбулдики уйғур муһаҗирларға бир түркүм ярдәм хизмити елип берилди

Ихтиярий мухбиримиз арслан
2016-07-16
Елхәт
Пикир
Share
Принт
Истанбулдики уйғур муһаҗирларға бир ярдәм
Истанбулдики уйғур муһаҗирларға бир ярдәм
RFA/Arslan

Йеқини йиллардин бери хитайдин қечип түркийәгә келип панаһланған уйғурларниң сани хели салмақни игиләйду. Мәлум болушичә, бу хилдики уйғур муһаҗирлардин бир нәччә йүз аилә түркийәниң қәйсәри шәһиригә орунлашқан болсиму, йәнә нәччә йүз аилә истанбулға йәрләшкән болуп, буларниң бәзилириниң һал - күни қийин әһвалда икән.

Йеқиндин буян мәркизи истанбулға җайлашқан «шәрқий түркистан маарип вә һәмкарлиқ җәмийити» ниң тиришчанлиқ қилиши билән истанбулда қийинчилиқта қалған бир қисим уйғурларға пул вә маддий ярдәм буюмлири тарқитилған.

Биз бу һәқтә техиму көп мәлуматқа еришиш үчүн шәрқий түркистан маарип вә һәмкарлиқ җәмийитиниң иҗтимаий ишлар мәсули керәм қарим вә аяллар бөлүм башлиқи мунәввәр өзуйғур ханим билән сөһбәт елип бардуқ.

Мунәввәр өзуйғурханимниң билдүрүшичә, моһтаҗлиқта қалған йетимләр, тул аялларниң тизимликлири қайта рәтлиниш билән биргә дохтурханида давалиниш еһтияҗи болғанларға, дохтурханиларни тонуштуруш, баһаси уйғун болған дохтурханилар яки һәмкарлишишини халайдиған дохтурлар билән алақилишип, давалаш ишлирини асанлаштурушқа тиришчанлиқ көрситилгән. Униңдин башқа тилда қийналған қериндашларға тәрҗиманлиқ қилиш сәпәрвәрлики елип берилған. Оқу - оқутуш ишлирида қийналған вә қийинчилиқларға йолуққанларға алақидар орунларға тонуштуруш билән биргә, уларға имканийәтниң йетишичә ярдәм қилинған.

Истанбулдики уйғур муһаҗирларға ярдәм тарқитилмақта
Истанбулдики уйғур муһаҗирларға ярдәм тарқитилмақта RFA/Arslan

«Шәрқий түркистан маарип вә һәмкарлиқ җәмийити» иҗтимаи ишлар мәсули керәм қаримниң билдүрүшичә, истанбулдики еһтияҗлиқ уйғур аилиләргә 10 тонна гөш, 10 тонна ун - гүрүч тарқитилған, униңдин башқа йәнә турмуш қийинчилиқи бар 40 әтрапида аилигә бир қанчә йилдин буян һәр айлиқи 500 лирадин нәх пул ярдәм берип кәлмәктә икән.

«Шәрқий түркистан маарип вә һәмкарлиқ җәмийити» аяллар бөлүми мәсули мунәввәр өзуйғур ханим ярдәм һәмкарлиқ хизмәтлири тоғрисида тохтилип мундақ деди: «рамизан кириштин илгири башланған тәшвиқат паалийити нәтиҗисидә, түркийәниң һәрқайси җайлиридин әвәтилгән сәдиқә, фитрә ярдәмлириниң миқдари ешиш билән биргә рамизан бойичә үзлүксиз иҗтимаий алақиләрдә моһтаҗларниң һалиға йеқиндин көйүнүп көңүл бөлидиған вәзийәт омумлашти. Рамизан ейи ичидә җәмий 60 нәпәр йетим вә ярдәмгә моһтаҗ оқуғучилиримиз вә пәрзәнтлиримизгә ‹ярдәм қоли иҗтимаий ярдәм җәмийити' вә шәхсләр тәрипидин 100 түрк лираси қиммитидә һейтлиқ кийим кийдүрүлди. Кийиндүрүлмигән йетимлиримизға һәр айлиқ ярдәм пулидин башқа йәнә киши бешиға 50 лирадин һейтлиқ қошуп берилди.»

Игилинишичә, маарип җәмийитиниң иҗтимаий ярдәм хизмәтләр бөлүмидин йетим, тул, вә ярдәмгә моһтаҗларға тарқитилған нәқ иқтисадий ярдәм пули вә сетивелиш картиси җәмий 40 миң түрк лирасиға йәткән. Буниң ичидә 15 миң түрк лираси «и һа һа инсаний ярдәм җәмийити» тәрипидин җәмийәтниң зәйтунбурну шөбисидә тарқитилип берилгән. Диянәт ишлири тәрипидин берилгән карта 5000 лира әтрапида болған. ярдәм қоли җәмийитидин кәлгән 500 лиралиқ картиму бу орунда тарқитилған.

Биз йәнә уйғур муһаҗирларниң әһвалини игиләш үчүн уйғур муһаҗир адил абдуғупур әпәнди билән сөһбәт елип бардуқ.

Адил әпәнди, истанбулдики уйғур муһаҗирларниң бир қисиминиң турмуш еһтияҗи қамдалған болсиму, бир қисим еһтияҗлиқ аилиләрниң мәвҗутлуқини билдүрди.

2009 - Йили йүз бәргән «үрүмчи вәқәси» дин кейин уйғурлар түркийигә келишкә башлиған болуп 2012 - йилидин башлап техиму көпләп келишкә башлиди. Толуқ болимиған мәлуматларға қариғанда, 2012 - йилидин 2015 - йилиғичә болған арилиқта түркийигә 8 мииң билән 10 миң әтрапида уйғурниң келип олтурақлашқанлиқи илгири сүрүлмәктә.

Бу уйғур муһаҗирларниң бир қисми сода - тиҗарәт қилиш, шеркәтләрдә ишләш арқилиқ түрмушини қамдап келиватқан болсиму, бир қисимлири ишсиз турмуш қийинчилиқиға учрап кәлмәктә икән. Хитай зулумидин қечип шәрқий түркистан асия әллири арқилиқ түркийигә кәлгән уйғурларниң бир қисими тайланд арқилиқ кәлгән болсиму, көп сандикилири малайсийә арқилиқ кәлгәнлики илгири сүрүлмәктә.

Пикирләр (0)
Share
Толуқ бәт