Istanbulda “Kommunistik xitay dewridiki Uyghurlarning étnosiyasiy tarixi” namliq kitab neshr qilindi

Yéqinda, tonulghan siyasetshunas qehriman ghojamberdining “Kommunistik xitay dewridiki Uyghurlarning étnosiyasiy tarixi” namliq kitabi istanbuldiki teklimakan neshriyatida yoruq kördi. Uyghurlarning ötmüsh tarixigha, medeniyitige, milliy herikitige munasiwetlik qiziqarliq matériyallarni öz ichige alghan bir nechche emgeklerning aptori q. Ghojamberdining bu qétimqi kitabi 1949 - yildin ta 2012 - yilghiche bolghan ariliqtiki kommunistik xitay mustemlikisi astida yashawatqan Uyghurlarning étnosiyasiy tarixigha béghishlan'ghandur.

9 Baptin ibaret, jemi 50 basma tawaq hejimdiki mezkur emgekte Uyghurlarning siyasiy we medeniy hayatigha, ma'aripigha, iqtisadigha, statistikisigha, ékologiyisige, ijtima'iy jem'iyetlik idiyisige we milliy heriketlirige a'it ilmiy jehettin tetqiq qilin'ghan muhim melumatlar orun alghan.

Almatada neshr qilinidighan jumhuriyetlik “Uyghur awazi” gézitining ötkenki sanida kitab heqqide qisqiche bérilgen axbaratta mundaq déyilgen: “Qehriman ghojamberdining qelimige mensup bolghan ushbu kitabning qimmiti shuningdin ibaretki, u 1949 - 2012 - yillar ariliqidiki sherqiy türkistanni mustemlikige aylandurush jeryanining tarixi, siyasiy - ijtima'iy teqiblesh heriketliri, millitimizning mushu dewrde élip barghan milliy azadliq küreshliri heqqide mupessel tehlil bilen yézilghan salmaqliq eserlerning biridur.”

Radi'omiz ziyaritini qobul qilghan siyasetshunas q. Ghojamberdi mezkur kitabni teyyarlashta paydilinilghan menbeler heqqide toxtaldi.