Türk tetqiqatchilirining “Istixbarat dunyasi” mawzuluq kitabida xitayghimu orun bérildi

“Istixbarat dunyasi” namdiki kitab.

Yéqindin buyan türkiyede istixbaratqa alaqidar köpligen kitablar neshr qilinip tarqitilishqa bashlidi. “Kiriptu neshriyati” teripidin “Istixbarat dunyasi” namdiki bir kitab neshr qilin'ghan bolup, bu kitabta dunyadiki chong döletlerning istixbarat teshkilatliri toghrisida muhim uchurlarni öz ichige alghan. 352 Betlik bu kitab, türkiye parlamént ezasi ümid özdagh qatarliq ondin artuq tetqiqatchining, dunyadiki bir qisim istixbarat teshkilatlargha alaqidar teyyarlighan tetqiqat maqalilirini öz ichige alidu.

“Istixbarat dunyasi” dégen kitabta yene xitay istixbarat teshkilati toghrisidimu muhakimiler yürgüzülgen. Kitabta yene xitay istixbarat teshkilatining qurulmisi we wezipisi toghrisida toxtilip mundaq déyilgen: xitay dölet bixeterlik ministirliqi 1983-yili qurulghan, wezipisi xitayning tashqi istixbarat, jasusluqqa qarshi istixbarat, siyasiy xewpsizlikke mes'ul teshkilat iken.

Dunyadiki istixbarat teshkilatliri dégen kitabta yene xitay istixbarat teshkilatining asasliqi ottura asiya, sherqiy asiya, amérika, yawropa qatarliq pütün qit'elerde jasusluq pa'aliyiti bilen shughulliniwatqan xelq'araliq jasusluq oyunchi ikenliki tilgha élin'ghan.

Türkiye hajettepe uniwérsitétining oqutquchisi shundaqla türkiye istratégiyilik chüshenchiler institutining tetqiqatchisi doktor erkin ekrem ependi türkiye-xitay munasiwetlirining küchiyishige shuningdek xitayning künsayin qudret tépishigha egiship, türkiyedimu xitayning uchur-axbarat toplash sistémisi we bixeterlik sistémisi heqqide chüshenchilerni chongqurlitish éhtiyaji küntertipke kéliwatqanliqini otturigha qoydi.

Türkiyediki Uyghur ziyaliysi mirkamil qeshqerli hazir metbu'atlarda xitayning türkiyede asasliqi soda uchurliri we Uyghur teshkilatlirining pa'aliyetlirigha a'it uchur toplashqa ehmiyet bériwatqanliqi ashkarilan'ghanliqini otturigha qoydi.